Fransa nəhəngi PSJ Mbappeni komandada saxlamaq üçün hər şeyi sınamaq niyyətindədir.

Valyuta.az xəbər verir ki, "Defensa Central" PSJ-nin Mbappeyə bir milyard avro dəyərində 10 illik müqavilə təklif etməyə hazırlaşdığını yazıb. Xəbərdə Mbappeni 34 yaşına qədər kluba bağlamaq və ömürlük PSJ formasını geyindirmək planlarının cızıldığı yazılıb. Bu həm də tarixin ən gəlirli müqaviləsi olacaq. 

Bununla belə, Mbappenin pullarla yanaşı, kuboklar qazana biləcəyi "Real"da oynamaq xəyalları qurduğu deyilir. Ulduz forvard artıq PSJ ilə yeni müqavilə imzalamağı düşünmədiyini və gələn yay sərbəst şəkildə klubdan ayrılmağı planlaşdırdığını bildirib. Rəhbərlik Mbappeyə ya yeni müqavilə imzalamalı, ya da bu yay komandanı tərk etməli olduğunu söyləyib.

Fransız ulduz Paris klubunun heyətində meydana çıxdığı 260 oyunda 212 qol vurmaqla yanaşı, 98 məhsuldar ötürmə ilə də yadda qalıb. 2018-ci ildə Fransa millisinin heyətində dünya kubokunu başı üzərinə qaldıran və Qətər 2022-də finala qədər yüksələn komandanın aparıcı oyunçusu olmasına baxmayaraq, Mbappe heç vaxt Paris klubu ilə Çempionlar Liqasının qalibi adını qazanmayıb. 

Elmir