Bir müddət Çin klubları ilə problem yaşayan Avropa futbolu bu dəfə Səudiyyə Ərəbistanının sıx pul hücumu altında müqavimət göstərməyə çalışır.

Valyuta.az xəbər verir ki, FİFA və UEFA-nın xəbərdarlığına baxmayaraq geri addım atmayan Səudiyyə Ərəbistanı Liqasınndakı klublar yüksək maaş və bonuslar ödəyərək bir çox ulduz futbolçu ilə müqavilə imzalayır. Bir müddət çinlilərin təzyiqi altında olan avropalılar 10 dəfə çox məvacib təklif edən Səudiyyə Ərəbistanı klubları qarşısında müqavimət göstərməkdə çox çətinlik çəkirlər.

Ötən mövsüm ölkə çempionu olan “Al-İttihad” “Seltik”də çıxış edən 24 yaşlı portuqaliyalı Joao Pedro ilə (Jota) 29, “Real”dan ayrılan Kərim Benzema ilə isə 200 milyon avro qarşılığında üçillik müqavilə bağlayıb. "Çelsi"nin fransız futbolçusu Nqolo Kante də "Al-İttihad"da üç il oynayacaq. O, bu müddətdə 100 milyon avro qazanacaq. 

Dünya çempionatından sonra Kriştiano Ronaldo “Al-Nasr”la 500 milyon avro qarşılığında  2,5 illik müqavilə bağladı. Sözügedən klub "İnter"in xorvatiyalı ulduzu Marselo Brozoviçi də transfer edib və ona 18 milyon avro ödəyib. Anderson Talişka və Piti Martinez kimi futbolçuların da yer aldığı “Al-Nasr” Brozoviçə üç il ərzində 100 milyon avro maaş verəcək.

Xorxe Xesusla illik 10 milyon avro şərtilə anlaşan “Al-Hilal”, portuqaliyalı Ruben Neveşlə 25 milyon avroya 4+1 illik müqavilə imzalamışdı. 26 yaşlı futbolçu üçün "Vulverhempton"un büdcəsinə 55 milyon əlavə edən “Al-Hilal” "Çelsi"dən seneqallı Xaliou Kolibalini 23 milyon avro ödəməklə aldı. Üstəlik klub üçillik müqavilə imzaladığı futbolçuya hər il 25 milyon avro ödəyəcək.

"Al-Ahli" "Liverpul"dan ayrıldıqdan sonra bir sıra klubların siyahısına daxil edilən braziliyalı hücumçu Roberto Firminonu 60 milyon avro qarşılığında heyətinə qatıb. Səudiyyə Ərəbistanı təmsilçisi, həmçinin təcrübəli qapıçı Eduard Mendini "Çelsi"dən almaq üçün 18,5 milyon avro ödəyib.

18 komandalı Səudiyyə Ərəbistanı Birinci Liqasında bu mövsüm 83 futbolçu transfer olunub. 122 əcnəbi futbolçunun yer aldığı liqadan gedən 86 nəfərdən əldə olunan gəlir 12 milyon 875 min avro olub. Yeni transfer olunan 83 futbolçuya isə 145 milyon avro ödənilib. Bu da o deməkdir ki, komandaların orta yaş həddinin 28 və ümumi dəyərinin 463 milyon avro olduğu liqada, FİFA-nın xəbər transferlərdən sonra indiyədək 132 milyon avrodan bir qədər çox kəsir qalıb.

Elmir