"Goldman Sachs" strateqləri dollarla bağlı proqnozlarını yeniləyərək, altı ay ərzində avronun dollar qarşısında paritetdən aşağı səviyyədə ticarət ediləcəyini təxmin ediblər.  

Valyuta.Az xəbər verir ki, aralarında Kamaşya Trivedinin də olduğu "Goldman" strateqləri yayımladıqları qeyddə “Yeni gömrük tariflərinin tətbiqi və ABŞ iqtisadiyyatının yüksək göstəricilərinin davam etməsi ilə dolların gələn il təxminən 5 % yüksələcəyini gözləyirik” ifadəsini işlədiblər.  

Bank, avro/dollar məzənnəsinin növbəti üç ay ərzində paritet səviyyəsində, altı ay ərzində isə 0,97 səviyyəsində olacağını proqnozlaşdırır.  

Funt sterlinq proqnozu 

Artan inflyasiya gözləntiləri və yüksələn istiqraz gəlirləri fonunda İngiltərə iqtisadiyyatını qiymətləndirən "Goldman" strateqləri, funt/dollar məzənnəsi ilə bağlı proqnozlarını növbəti altı ay üçün 1,32-dən 1,22-yə endiriblər.  

Digər tərəfdən, İngiltərə iqtisadiyyatı ilə bağlı büdcə kəsiri narahatlıqları funt sterlinq üçün vəziyyəti opsion bazarında da qaranlıqlaşdırır.  

Bazar iştirakçıları funtun dollar qarşısında təxminən 8 %-ə qədər dəyər itirəcəyini təxmin edir. Funt üzrə opsionlara maraq artarkən bəzi treyderlər məzənnənin 1,12 səviyyəsindən aşağı düşəcəyi ilə bağlı əməliyyatlar həyata keçiriblər.  

"Candriam"da fond meneceri olan Ceymi Niven (Jamie Niven) qeyd edib: “Bir tərəfdən İngiltərə Mərkəzi Bankının faiz endirimləri çox məhdud şəkildə qiymətləndirilir, digər tərəfdən isə maliyyə narahatlıqları funt sterlinq üçün mənfi təsir göstərir.”  

Rəhim