ABŞ-nin və dünyanın ən mühüm banklarından biri olan "JPMorgan", 2025-ci ildə də “Bitcoin”in “Ether” və digər altkoinlər üzərindəki üstünlüyünün davam edəcəyini gözləyir. Bankın analitikləri paylaşdıqları hesabatda bu tendensiyanın səbəblərini izah edən 8 əsas amili qeyd ediblər.  

2024-cü ildə ABŞ-da ETF-lərin qəbul edilməsi ilə birlikdə sürətlə dəyər qazanan “Bitcoin”, “Ether” başda olmaqla bir çox altkoinləri geridə qoymuşdu. Hazırda bu üstünlüyün davam edib-etməyəcəyi xüsusilə altkoinlərə sərmayə qoyan investorların diqqət mərkəzindədir. "JPMorgan" analitikləri isə bu üstünlüyün 2025-ci ildə də davam edəcəyini bildiriblər.  

Nikolaos Panigirzoglu (Nikolaos Panigirtzoglou) rəhbərliyində hazırlanan son müştəri hesabatında “Bitcoin-in Ether və digər altkoinlərə qarşı üstünlüyünün davam edəcəyini gözləyirik” ifadəsi yer alıb və bu proqnoz 8 əsas səbəblə dəstəklənib:  

1. Dəyər itkisindən qorunmaq üçün sərmayələr:  
Hesabata görə, bir çox ölkələrdə milli valyutaların sürətli dəyər itirməsi insanları və şirkətləri məhdud təchizata malik və dəyər saxlayan aktivlərə yönəldir. Analitiklər, qızıl və “Bitcoin” kimi məhdud təchizata malik aktivlərin bu baxımdan daha çox üstünlük qazanacağını düşünürlər.  

2. "MicroStrategy" alımları:  
"JPMorgan" analitikləri bildiriblər ki, "MicroStrategy" şirkətinin 42 milyard dollarlıq “Bitcoin” alma planının hələ yarısı tamamlanmayıb və şirkət bu il də aqressiv alımlarına davam edəcək.  

3. Ölkələrin rezerv seçimi:  
Hesabatda ABŞ və digər bəzi ölkələrin bu il “Bitcoin”i öz valyuta ehtiyatlarına daxil edəcəkləri və bunun “Bitcoin” qiymətini artıracağı qeyd edilib.  

4. “Bitcoin”in ikinci qatman şəbəkələri:  
“Bitcoin”in ikinci qatman şəbəkələrinin sayının artması, bu şəbəkələrin ağıllı müqavilələri dəstəkləməsi səbəbindən “Ethereum” kimi şəbəkələrə rəqib olacağı vurğulanıb.  

5. Açıq blokçeyn şəbəkələrinə azalan maraq:  
Hesabatda rəqəmsal istiqraz ticarəti və digər əməliyyatların artıq getdikcə daha çox özəl və ya konsorsium blokçeyn şəbəkələrinə keçdiyi bildirilib. Bu da “Ethereum” kimi açıq şəbəkələrə olan marağı azalda bilər. Lakin “Bitcoin” şəbəkəsinin bu vəziyyətdən təsirlənməyəcəyi düşünülür.  

6. Yeni strategiyaların tətbiqi:  
2021-2022-ci illərdəki boğa bazarlarında müşahidə edilən token mərkəzli yanaşmaların artıq yerini infrastruktur inkişafına verdiyi qeyd olunub. Məsələn, “Coinbase” tərəfindən dəstəklənən və token-ə malik olmayan “Base” şəbəkəsi buna nümunə kimi göstərilib.  

7. Mərkəzsiz layihələrin zəifləməsi:  
Mərkəzsiz layihələrin 2021-ci ildə əldə etdiyi populyarlıqdan sonra ciddi şəkildə zəifləmiş olduğu bildirilib. “Friend.tech”, “Farcaster” və “Lens” kimi mərkəzsiz sosial media platformalarının geniş qəbul görməsi üçün hələ çox vaxta ehtiyacı olduğu qeyd edilib.  

8. Müsbət tənzimləmələrin qeyri-müəyyənliyi:  
ABŞ-da kriptovalyutalara dair müsbət tənzimləmələrin “Bitcoin”ə təsirinin böyük olacağı düşünülür. Ancaq bu tənzimləmələrin digər kriptovalyutalara nə qədər təsir edəcəyinin hələ də qeyri-müəyyən olduğu vurğulanıb.  

Bu səbəblərlə "JPMorgan", “Bitcoin”in dominantlığının bu il də artacağını proqnozlaşdırır.  

Aydın