Dünyanın ən böyük aktiv idarəçisi olan "BlackRock" (BLK) "Bitcoin"lə bağlı reklam yayımlayıb. Lakin həmin reklamda yer alan xəbərdarlıq ifadəsi kriptovalyuta icmasında geniş müzakirələrə yol açıb. 

"iShares Bitcoin Trust" (IBIT) ETF səhifəsində yayımlanan üç dəqiqəlik video, "Bitcoin"in sabit təklifinin əhəmiyyətinə diqqət çəkir. Lakin videoda “Bitcoin"in 21 milyonluq təklif məhdudiyyətinin dəyişməyəcəyinə dair heç bir zəmanət yoxdur” ifadəsi xüsusilə diqqət çəkib və etirazlara səbəb olub.  

Reklam "Bitcoin"in əsas prinsiplərini və pulun təkamülünü izləyicilərə çatdırsa da, bu xəbərdarlıq, "Bitcoin"in 21 milyonluq təklif məhdudiyyətini möhkəm dəyər kimi görənlərin narazılığına səbəb olub. Xüsusilə Maykl Seylorun bu məsələyə dair sosial media paylaşımı müzakirələrin miqyasını genişləndirib.  

Kripto icmasının reaksiyası  

Bəzi kripto həvəskarları və analitiklər, "BlackRock" kimi böyük institusional investorların "Bitcoin" protokolunda dəyişiklik etmək imkanına malik ola biləcəyindən narahatdırlar. Anatoli Yakovenko, "BlackRock" və Maykl Seylorun "Bitcoin"in təklif məhdudiyyətini qorumaq üçün öhdəlik götürməli olduğunu bildirib və ənənəvi maliyyə dünyasının kriptovalyutalara yanaşmasını tənqid edib.  

Digər tərəfdən, kripto icmasının tanınmış simalarından Adam Bak, xəbərdarlığın "BlackRock"-un hüquqi öhdəlikləri səbəbilə əlavə edildiyini izah edib. Çarli Şrem  isə "Bitcoin"in 21 milyonluq təklif məhdudiyyətinin dəyişdirilməsinin tamamən yeni bir kriptovalyutanın yaradılması anlamına gələcəyini vurğulayıb. Piter Todd  isə nəzəri olaraq, əgər icma razılıq əldə edərsə, müəyyən dəyişikliklərin mümkün ola biləcəyinə toxunub.  

İnstitusional təsir və "Bitcoin"in əsas dəyərləri 

"BlackRock"-un böyük miqdarda "Bitcoin" idarə etməsi, "Bitcoin" tərəfdarları arasında institusional təsir barədə narahatlıqları artırıb. "Bitcoin"in sabit təklifi, onu inflyasiyaya meyilli fiat valyutalarından fərqləndirən əsas xüsusiyyətlərdən biri kimi qəbul edilir. Lakin "BlackRock"-un xəbərdarlığı ilə birlikdə təklif məhdudiyyətinin dəyişdirilməsi ilə bağlı spekulyasiyalar, "Bitcoin" icmasında əvvəllər yaşanan mübahisələri yenidən gündəmə gətirib.  

Xüsusilə "Blocksize War" kimi tanınan mübahisələr zamanı "Bitcoin"in blok ölçüsünün artırılıb-artırılmaması mövzusu icmanı ikiyə bölmüş və nəticədə "Bitcoin Cash" kimi fərqli çatal layihələri yaranmışdı. Bu reklam, kripto aktivlərinin mərkəzsiz quruluşunu qorumaq üçün icmanın daha sıx birliyinə çağırış edir.  

"BlackRock"-un reklamında yer alan xəbərdarlıq ifadəsi, həm kriptovalyuta icmasında, həm də daha geniş maliyyə dairələrində diqqətlə izlənilməyə davam edir. Keçmişdə olduğu kimi, icmanın institusional təsirlərə qarşı bir araya gəlib reaksiyasını göstərməsi, kriptovalyutaların mərkəzsiz təbiətini qorumaq səyi kimi qiymətləndirilir. 

Valyuta.Az