ABŞ prezident seçkiləri öncəsi, investorlar kriptovalyuta bazarlarında rekord səviyyədə fəallıq göstərirlər. Xüsusilə Donald Trampın yenidən prezident seçiləcəyi ehtimalları fonunda Bitcoin fondlarına böyük həcmdə valyuta axını müşahidə olunur.

Valyuta.az xəbər verir ki, bu barədə "The Block" məlumat yayıb. Məlumata əsasən, Bitcoin-in spot qiymətini izləyən birjada ticarət olunan fondlar (ETF) çərşənbə günü 917,2 milyon dollarlıq valyuta axını qeydə alıb ki, bu da mart ayından bəri ən böyük bir günlük artımdır. Bitcoin-in dəyəri oktyabr ayında təxminən 12% artıb və bu artım Trampın mümkün prezidentlik qələbəsi ilə əlaqələndirilir.

Qeyd edək ki, ictimai rəy sorğuları Tramp və Demokratlar arasında başabaş mübarizə olduğunu göstərsə də, bəzi proqnoz saytları Trampın qalib gəlmə ehtimalını daha yüksək dəyərləndirir. Bu qeyri-müəyyənlik mühitində kripto törəmə birjası "Deribit" tərəfindən verilən məlumatlara görə, investorlar seçki həftəsində təxminən 3,7%-lik günlük qiymət dalğalanmalara hazırlaşır.

Bitcoin və Ethereum ETF-lərində canlanma

Seçkidən bir həftə əvvəl Bitcoin ETF-ləri üçün həftəlik xalis valyuta axınları mart ayından bəri ən yüksək səviyyələrə çatıb və ABŞ bazarındakı spot Bitcoin ETF-lərində artan investor marağı səbəbindən yüksək həcmdə valyuta axını qeydə alınıb. Bazar ertəsi 479,4 milyon dollar, çərşənbə axşamı 870,1 milyon dollar, çərşənbə günü isə 893,3 milyon dollarlıq valyuta axını baş verib. Həftənin sonuna doğru daha sakit bir kurs müşahidə olunub.

Digər tərəfdən, Ethereum ETF-lərinin valyuta axını Bitcoin qədər böyük olmasa da, müəyyən dərəcədə maraq qazanıb. Spot Ethereum ETF-ləri çərşənbə axşamı 7,6 milyon dollar, çərşənbə günü 4,4 milyon dollar və cümə axşamı 13 milyon dollarlıq valyuta axını qeydə alıb. Ümumilikdə, Ethereum ETF-ləri həftəni pozitiv nəticə ilə başa vurub.

Bitcoin və Ethereum-da son vəziyyət

Bitcoin qiyməti, həftənin əvvəlində fondlara daxil olan valyutanın təsiri ilə çərşənbə axşamı 73.600 dollara çatıb. Lakin sonrakı günlərdə Trampın namizədliyi ilə bağlı spekulyasiyalar səbəbindən dəyər itirib. Ethereum isə həftəlik əsasda 1,8% dəyər itirməsinə baxmayaraq, yeni həftəyə 2.450 dolların üzərində başlayıb.

Bitcoin, keçən həftəni 69.000 dolların altında başa vurub. Yeni həftəyə isə yuxarı istiqamətli ivmə ilə başlayan BTC, günün ilk saatlarında 69.500 dollara qədər yüksəlsə də, səhər saatlarında gələn satışlarla 68.500 dollar aralığına qədər geriləyib.

Rəhim