"Nvidia Corp." şirkətinin rekord qazanclarla dolu ili, icraçı direktor Censen Xuanqın (Jensen Huang) sərvətini yeni zirvələrə daşıyıb.

Bundan əlavə, çip istehsalçısının uzun müddətdir fəaliyyət göstərən üç idarə heyəti üzvü də milyarderlər sırasına əlavə olunub.

Valyuta.Az xəbər verir ki, "Bloomberg Milyarderlər İndeksi"nə görə, "Nvidia"nın quruluş günlərindən idarə heyətində təmsil olunan Tenç Koksun (Tench Coxe) sərvəti ilk dəfə olaraq 5,4 milyard dollar olaraq qiymətləndirilib. Şirkətin üçüncü ən böyük fərdi səhmdarı olan 66 yaşlı Koks, 32 milyondan çox səhmə sahibdir. O, sərvəti ilə bağlı şərh verməkdən imtina edib.  

Mark Stivens və Harvi Cons  

"Bloomberg" tərəfindən toplanan məlumatlara görə, dünyanın ən zəngin 298-ci şəxsi olan və 9,3 milyard dollar sərvətə sahib Mark Stivens (Mark Stevens), eləcə də şirkətdə 1 milyard dollarlıq mövqeyə sahib və 300 milyon dollardan çox səhmləri satan Harvi Cons (Harvey Jones) milyarderlər sırasında yerini alıb.  

Bir şirkətin bir neçə milyarder yetişdirməsi nadir bir hadisədir, xüsusilə də qurucu ortaqlar və ya ailə dinastiyasının üzvləri deyil, rəhbər şəxslər olduğu halda bu, daha qeyri-adi sayılır. "Nvidia"nın səhmləri 2024-cü ildə 171% artaraq, süni intellektdə istifadə olunan çiplərə olan böyük tələbat fonunda "S&P 500" indeksində ikinci ən yaxşı nəticə göstərən şirkət olub.  

Uğurlu son  

"Virciniya Tex"də rəhbər və direktorların kompensasiyası ilə bağlı araşdırmalar aparan maliyyə professoru Felipe Kabezon (Felipe Cabezon) bildirib ki, bu uğur, şirkətin inkişafı ilə bağlı unikallığından irəli gəlir və bonusların ödənilməsi üsulu ilə əlaqəli deyil.  

Professor Kabezon deyib:  
"Rəhbərlər, şirkəti inkişaf etdirmək və performansı yaxşılaşdırmaq üçün stimul olaraq bonus ödəmələri alırlar və uğur qazanırlarsa, həm özləri, həm də şirkətin səhmdarları üçün dəyər yaradırlar. Burada müşahidə etdiyimiz tam olaraq bu hekayədir. Əsasən, bu uğurlu bir sondur."

"Nvidia"nın üç milyarder direktoru və Censen Xuanqın ümumi sərvəti 130 milyard dolları keçib. Bu da çip istehsalçısının idarə heyətini dünyanın ən zəngin 10 idarə heyəti sırasına yüksəldib.  

Censen Xuanq  

"Bloomberg Milyarderlər İndeksi"nə əsasən, Xuanq 2024-cü ildə sərvətini 70 milyard dollardan çox artıraraq, hazırda 114,4 milyard dollar sərvətlə dünyanın ən zəngin 12-ci şəxsi olub. İdarə heyətinin beşinci üzvü Bruk Suell (Brook Seawell) də yaxın zamanda milyarderlər sırasına qoşula bilər. O, 1997-ci ildən idarə heyətində təmsil olunur və hazırda "Nvidia"da təxminən 700 milyon dollarlıq mövqeyə malikdir.  

Rəhim