"Samsung Electronics" uzun müddət Koreyanın iqtisadi inkişafı ilə paralel şəkildə inkişaf edən bir "inci" kimi qəbul edilirdi. Yerli pərakəndə investorlar bazar zəifləsə belə, şirkətə yatırım etməyin zamanla gəlir gətirəcəyinə inanırdılar.

Valyuta.Az "The Korea Times"a istinadən xəbər verir ki,  "Samsung Electronics" səhmlərinin qiyməti 11 iyulda 88,800 von (61,06 dollar) ilə zirvəyə çatdıqdan sonra davamlı enişdədir və bu həftənin çərşənbə axşamı 54,000 von (37,17 dollar) səviyyəsinə düşüb. ABŞ-ın "CHIPS Act" proqramı çərçivəsində 4,75 milyard dollarlıq subsidiya elan edilməsi bu həftənin əvvəlində qısa müddətli artım təmin etsə də, uzunmüddətli bərpa ilə bağlı gözləntilər yerinə yetməyib.

Ən çox diqqət çəkən amil xarici kapitalın çıxışıdır. Bu ilin əvvəlindən xarici investorlar "Samsung Electronics"də 10,4 trilyon von (7,16 milyard dollar) dəyərində xalis satış həyata keçiriblər. Bu rəqəm ümumi ticarət həcminin 96 faizini təşkil edir və son iqtisadi çətinliklər fonunda belə nəzərəçarpan bir satış dalğasıdır.

Ekspertlər "Samsung"un zəif göstəricilərini əsasən çip istehsalı sektorunda ümumi enişlə əlaqələndirirlər. On illər boyu "DRAM" yaddaş çiplərində rəqabət üstünlüyünə malik olan "Samsung", artıq təklifin çoxluğu səbəbindən qiymətlərin azalmasından ciddi zərər görür.

Eyni zamanda, süni intellektin sürətli inkişafı yüksək ötürücülü yaddaş ("HBM") çiplərinə tələbatı artırıb. "Samsung", bu tendensiyanı düzgün qiymətləndirə bilməyib və rəqibi "SK hynix"in "Nvidia"ya bu xüsusi çipləri tədarük etməkdə demək olar ki, inhisar yaratmasına imkan verib.

"IV rübdə fəaliyyət mühiti əsasən əlverişsiz qiymətləndirilir," deyə "IBK Securities"in analitiki Kim Un-ho bildirib. "Yarımkeçirici bölmədə həm yaddaş, həm də qeyri-yaddaş seqmentlərində zəifliklərin olması ehtimal edilir."

Bu azalma yeni deyil. 14 noyabrda "Samsung"un səhmləri dörd ilin ən aşağı səviyyəsinə düşdü və rəhbərlik 10 trilyon von (6,89 milyard dollar) dəyərində səhmlərin geri alınması planını elan etdi. Bundan əvvəl, 8 oktyabrda üçüncü rüblük əməliyyat gəliri gözləntiləri ödəyə bilmədi və bu, şirkət rəhbərliyinin ictimaiyyətdən üzr istəməsinə qədər gətirib çıxardı.

2025-ci ilə dair proqnozlar da qeyri-müəyyəndir. Von-dollar məzənnəsi 1,400 von (0,96 dollar) ətrafında sabitləşib. Donald Tramp administrasiyasının ikinci dövrü ilə daha aqressiv bir tarif rejimi gündəmdə ola bilər.

"Çinə qarşı əlavə ABŞ sanksiyaları, "Samsung Electronics"in Çində fəaliyyət göstərən "HBM" biznesi üçün qısamüddətli əlverişsiz amil ola bilər," deyə "Kiwoom Securities"in analitiki Pak Yu-ak qeyd edib.

IV rüb üçün əməliyyat gəlirləri üzrə cari proqnozlar 9,38 trilyon von (6,46 milyard dollar) təşkil edir ki, bu da ötən ilin eyni dövrü ilə müqayisədə 30,8 faiz azalmadır.

Şirkətin yanvarda açıqlayacağı IV rüblük gəlirləri ərəfəsində narahatlıqlar artır və broker sektoru qiymət hədəfini endirib. "Market tracker FnGuide"in çərşənbə axşamı verdiyi məlumata görə, "Samsung Electronics" səhmləri üzrə konsensus 82,125 von (56,55 dollar) təşkil edir ki, bu da üç ay öncəki göstəricidən 20 faiz azdır.

"Səhmlərin qiymətində əhəmiyyətli azalma ehtimalı azdır, lakin "Samsung Electronics" gəlir proqnozlarının aşağı yenidən qiymətləndirilməsi ehtimalı, səhmlərin qiymətinin əhəmiyyətli dərəcədə bərpa olunması üçün daha çox vaxt tələb edəcəyini göstərir," deyə "iM Securities" analitiki Son Myonq-sop bildirib.

Bütün bu çətinliklərə baxmayaraq, analitiklər hələ də investisiya tövsiyə edirlər. Son əlavə edib: "Yarımkeçirici qiymət azalması dövrü artıq böyük ölçüdə nəzərə alınıb."

Rəhim