Valyuta.Az "Financial Times"da dərc olunmuş məqalənin icmalını təqdim edir:

ABŞ iqtisadi üstünlüyü və narahatlıqlar

Maliyyə analitikləri arasında 2025-ci il üçün əsas müzakirə mövzularından biri ABŞ bazarlarının üstünlüyüdür. Donald Trampın (Donald Trump) beynəlxalq ticarət, miqrasiya və vergi siyasətinin inflyasiya təzyiqləri yaratmasına və fiskal baxımdan riskli hesab olunmasına baxmayaraq, analitiklər ABŞ bazarlarını investisiya üçün ən mühüm istiqamət kimi qiymətləndirirlər.

"Financial Times" ("FT")  şərhçisi Keyti Martin (Katie Martin) bu “Amerika istisnacılığı” narrativinin müəyyən narahatlıqlar doğurduğunu vurğulayır: “Əgər bu narrativdə* nəsə səhv gedərsə, investorlar eyni anda təhlükəsizlik axtarışına keçə bilərlər.”

Ticarət tarifləri və potensial təsirlər

Tramp administrasiyasının Çinlə ticarətdə tətbiq etdiyi yüksək tariflər və digər ölkələrə qarşı sərt yanaşma investorlar üçün risk yarada bilər.

İqtisadçı Salman Əhməd (Salman Ahmed) hesab edir ki, 2025-ci ildə ABŞ Çin idxalının 60%-nə, digər ölkələrin isə 20%-nə tarif tətbiq etməklə daha sərt mövqe sərgiləyə bilər. Bu yanaşma, xüsusilə Avropa ilə iqtisadi münasibətlərdə gərginlik yarada bilər.

ABŞ-da inflyasiya və fiskal dayanıqlılıq**

2025-ci ildə əlavə vergi güzəştlərinin ABŞ büdcə kəsirini "ÜDM"in 8%-nə çatdıracağı gözlənilir. Bu səviyyədə borclanma digər ölkələr üçün qəbuledilməz olsa da, ABŞ bazarlarının likvidliyi bu riskləri udmağa imkan verir. Lakin uzunmüddətli fiskal dayanıqlıq sual altındadır.

Kriptovalyutalar və onların gələcəyi

"Bitcoin" qiymətinin 100 000 dollardan yuxarı qalxmasından sonra "FT" panelində kriptovalyutalar müzakirə olunub.

Analitiklər arasında kripto aktivlərinin hələ də əsaslı istifadəyə malik olmadığını düşünənlər olsa da, qiymətlərin sürətlə yüksəlməsi bəzi investorları bu bazara cəlb edir.

Avropa və Çin bazarları

Avropa bazarlarının 2025-ci ildə böyük qazanc əldə edəcəyi gözlənilir, xüsusilə Çin iqtisadiyyatında müsbət irəliləyişlər baş verərsə. Çin üçün əsas problemlərdən biri demoqrafik böhran və əmlak sektorundakı borc deflyasiyasıdır. Lakin investorlar, xüsusilə Avropa şirkətləri vasitəsilə, Çinlə bağlı fürsətlərdən yararlana bilərlər.

Böyük Britaniyada imkanlar

Böyük Britaniya bazarlarında uzun müddətdir davam edən pessimizmə baxmayaraq, müəyyən sektorlarda yüksək gəlirli orta və kiçik kapital şirkətləri böyük potensial təklif edir. "FT" analitikləri, xüsusilə bank sektoru, "Experian" kredit reytinq şirkəti və süni intellektdən yararlanan şirkətlərin uğurlu olacağını bildirirlər.

Sonda nəyi izləmək lazımdır?

Panel iştirakçıları ABŞ bazarlarının hələ də yüksək maraq doğurduğunu, lakin potensial risklərə qarşı həssas olduğunu vurğulayıblar. Bundan əlavə, Avropa və Çin bazarlarında daha çox fürsət ola biləcəyi, lakin bu bazarların geosiyasi və iqtisadi dəyişikliklərə həssas olduğu qeyd olunub.

Investorlar 2025-ci ildə bazar dəyişikliklərini diqqətlə izləməli, diversifikasiya edilmiş portfellər qurmalı və uzunmüddətli riskləri nəzərə almalıdırlar.

İZAHAT:

* Narrativ - hadisə və ya fikirlərin müəyyən bir baxış bucağı ilə ardıcıl şəkildə izah edildiyi hekayə və ya düşüncə çərçivəsidir.

** Fiskal dayanıqlıq - dövlətin uzunmüddətli dövrdə öz borc öhdəliklərini və xərclərini mövcud gəlir mənbələri ilə balanslı şəkildə idarə edə bilmə qabiliyyətidir.

Aydın / Valyuta.Az / SƏHƏR OXUSU