Bu həftə "Nvidia" və onun baş icraçı direktoru Censen Xuana (Jensen Huang) məxsusdur.

Valyuta.az "Yahoo Finance"a istinadən xəbər verir ki, Federal Ehtiyat Sistemi rəhbəri Cerom Pauelin (Jerome Powell) "İqtisadiyyat faiz dərəcələrini azaltmağı tələb edən heç bir siqnal vermir" açıqlaması cümə axşamı və cümə gününü səhmlərin qiymətlərinin aşağı düşməsinə səbəb oldu.

Proqnozlara görə bu həftə "Nvidia" və onun NVDA kodlu səhmləri üçün əlamətdar olacaq. Çərşənbə günü şirkətin hər səhmdə 74 sent gəlir əldə etməsi gözlənilir ki, bu da ötən ilin müvafiq dövrü ilə müqayisədə 85% artım deməkdir. "Zacks"ın məlumatına görə, gəlirlər ötən illə müqayisədə 81,1% artaraq 32,8 milyard dollar təşkil edə bilər.

"Nvidia" süni intellektin işləməsi üçün həyati əhəmiyyət kəsb edən yüksək səviyyəli çiplər və avadanlıqlar bazarına hakimdir.

Şirkətin səhmləri bu il 186,7% artıb. Cümə günü səhmlər 3% ucuzlaşsa da, günün sonunda "Nvidia"nın bazar dəyəri 3,483 trilyon dollar təşkil edib.

Bu rəqəm güclü "Apple"ın (AAPL) bazar dəyərindən də çoxdur. "Apple"ın bazar dəyəri həmin gün 3,40 trilyon dollar idi.

"Apple"ın səhmləri bu il yalnız 16,9% artıb və bu, "Möhtəşəm 7-lik" kimi tanınan şirkətlər arasında "Microsoft" (MSFT) ilə birlikdə ən zəif göstəricilərdən biridir. "Microsoft"un səhmləri bu il 10,4% artıb.

Beləliklə, bu həftə diqqət "Nvidia"ya yönələcək.

Bu həftə nəhəng şirkətlərin hesabatları gözlənilir

Önümüzdəki həftə ilin ən böyük hesabat dövrlərindən biri olmasa da, bir neçə iri şirkətin hesabatları maraq doğurur.

Qısaca icmal:

► Çərşənbə axşamı: "Walmart" (WMT) səhərlər ABŞ bazarları açılmadan əvvəl hesabat təqdim edəcək. Onun səhmləri bu il yalnız 60% artıb. Həmçinin, "Lowe's" (LOW) və tibbi cihaz şirkəti "Medtronic" (MDT) də hesabat verəcək.

► Çərşənbə: "Nvidia" ilə yanaşı, pərakəndə ticarət şirkəti "TJX" (TJX), kibertəhlükəsizlik firması "Palo Alto Networks" (PANW) və nəhəng pərakəndə şirkət "Target" (TGT) hesabatlarını açıqlayacaq.

► Cümə axşamı: "Intuit" (INTU), kənd təsərrüfatı avadanlığı istehsalçısı "Deere & Co." (DE), "Ross Stores" (ROST) və Çin internet pərakəndəçisi "Baidu.com" (BIDU).

ABŞ bazarları üçün əsas suallar

Bazarlar üçün əsas məsələ inflyasiya ilə mübarizədir. Federal Ehtiyat Sistemi və Cerom Pauel ötən həftə inflyasiya təzyiqlərinin davam etdiyini xatırlatdı.

Pauel Dallasda etdiyi çıxışda faiz dərəcələrini azaltmağın tələsik qərar olmayacağını vurğulamaq istəyirdi. Onun mesajı eşidildi:

- "S&P 500" indeksi həftəni 2,1% azalma ilə tamamladı.  
- Nasdaq indeksi 3,2% gerilədi.  
- "S&P 500"ün yalnız iki sektoru – enerji və maliyyə – həftəni müsbət nəticələrlə başa vurdu.

Mənzil bazarı ilə bağlı məlumatlar açıqlanacaq

Bu həftə mənzil bazarına dair statistik məlumatlar diqqət mərkəzində olacaq.

Bazar ertəsi "Milli Mənzil Tikinti Assosiasiyası" mənzil bazarı indeksini açıqlayacaq. Bu indeks:  
1. Mövcud satışları,  
2. Növbəti altı ayda gözlənilən satışları,  
3. Müştəri axınını əks etdirir.

Çərşənbə axşamı Ticarət Nazirliyi oktyabr ayı üzrə mənzil tikintisi və tikinti icazələri ilə bağlı hesabat təqdim edəcək. Cümə axşamı isə "Milli Realtorlar Assosiasiyası" oktyabr ayı üzrə mövcud ev satışlarını illik göstəricilər əsasında paylaşacaq.

Bütün bu məlumatlar mənzil bazarının vəziyyətini, eləcə də faiz dərəcələrinin bazara təsirini daha yaxşı anlamağa imkan verəcək.

Rəhim