Ötən ilin yanvar ayında Əmək və Əhalinin Sosial Müdafiəsi Nazirliyi məcburi köçkünlər üçün tikilmiş 1662 mənzilin onlayn satışına başlayıb. Satışa çıxarılan mənzillər Qaçqınların və Məcburi Köçkünlərin İşləri üzrə Dövlət Komitəsinin sifarişi ilə Bakının Ramana, Ümid, Kürdəxanı qəsəbələrində, Abşeron və Samux rayonlarında inşa edilən binalarda yerləşir.

Satışı ötən il iyulun 1-də yekunlaşacağı gözlənilsə də, hazırda mənzillərin satışı davam edir. Nazirliyin 2024-cü ilin fevral ayındakı məlumatında 300 mənzilin satıldığı qeyd edilmişdi. Hazırda xeyli sayda mənzil bron edilib.

Valyuta.az Bizim.Media-ya istinadən onlayn satışı davam edən mənzillərin qiymətlərini təqdim edir:

Abşeron rayonu - Yeni yaşayış kompleksində 4 otaqlı, 101.8 kvadratmetr sahəyə malik təmirli mənzilin qiyməti 84 min 494 AZN təşkil edir. Eyni binada 3 otaqlı, 84.1 kvadratmetrlik sahəli mənzilin qiyməti isə 65 min 598 manatdır.

Bakı şəhəri, Kürdəxanı qəsəbəsi – Yeni yaşayış kompleksində 4 otaqlı, 85.1 kvadratmetr sahəyə malik təmirli mənzil 71 min 484 AZN-ə təklif olunur. 71 kvadratmetr sahəyə malik 3 otaqlı mənzilin qiyməti isə 59 min 640 AZN-dir.

Bakı şəhəri, Ramana qəsəbəsi – Yeni yaşayış kompleksində 4 otaqlı, 100.7 kvadratmetr sahəli tam təmirli mənzilin qiyməti 85 min 595 AZN-dir. Evin hər kvadratmetri 850 manatdan hesablanıb. 3 otaqlı, 79.4 kvadratmetrlik sahəli ev isə 67 min 490 AZN-ə təklif olunur.

Bakı şəhəri, Ümid qəsəbəsi – Yeni yaşayış kompleksində 4 otaqlı, 105.6 kvadratmetr sahəyə malik təmirli mənzilin qiyməti 78 min 144, 89.6 kvadratmetrlik 3 otaqlı mənzilin qiyməti 62 min 720 AZN-dir.

Samux rayonu – Yeni yaşayış kompleksində 4 otaqlı, 100.5 kvadratmetr sahəli tam təmirli mənzilin qiyməti 43 min 717 AZN-dir. Yəni evin bir kvadratmetri 435 manata təklif olunur. Samux rayonunda satışa çıxarılan mənzillər arasında 3 otaqlı mənzil yoxdur.