Ziqzaq memarlıq dizaynı binalar tərəfindən udulmuş və yenidən kosmosa buraxılan istilik miqdarını məhdudlaşdıra bilər.

AZƏRTAC “The Guardian” nəşrinə istinadla xəbər verir ki, Nyu-Yorkun Kolumbiya Universitetinin tədqiqatına əsasən, binaların divarlarında ziqzaq dizaynından istifadə həddindən artıq qızmış binaların soyumasına kömək edə bilər. Binalar hazırda qlobal enerji istehlakının təxminən 40 faizini təşkil edir və qlobal karbon qazı emissiyasının üçdəbirindən çoxuna cavabdehdir. Bu enerjinin böyük hissəsi kondisionerlərin istifadəsindən əldə edilir. Alimlər nəzarət edilmədiyi təqdirdə bu rəqəmin 2050-ci ilə qədər iki dəfə artacağını gözləyirlər.

Planet istiləşməyə davam etdikcə, binaların soyudulmasına ehtiyac da artmaqda davam edir. Bu artan problemi həllə etməyə çalışan alimlər enerji istehlakından asılı olmayan passiv soyutma həllərini araşdırırlar.

Qilong Çengin rəhbərlik etdiyi bir qrup binanın səthinin temperaturunu heç bir enerji sərf etmədən düz divarlarla müqayisədə 3 dərəcə Selsi azalda bilən ziqzaq divar dizaynı təklif edib. Bu konfiqurasiya günəş işığını əks etdirən və Yer atmosferi vasitəsilə kosmosa uzundalğalı infraqırmızı radiasiya yayan passiv soyutma strategiyasından istifadə edir.

Bu yeni dizayn son on ildə radiasiyalı soyutma tələbini azaltmaq üçün enerjiyə qənaət edən bir üsul kimi diqqəti cəlb edib.