Ölkələr arasında ticarət dövriyyəsinin 2 dəfə artacağı proqnozlaşdırılır.

Orta Dəhliz çərçivəsində Azərbaycanın Türkiyə ilə birlikdə həyata keçirdiyi nəqliyyat layihələri iki ölkə arasından ticarət dövriyyəsini iki dəfəyə qədər artıracaq.

Prezident İlham Əliyev Ankarada mətbuat nümayəndələri qarşısında çıxışı zamanı vurğulayıb ki, bu layihələr artıq çoxdan regionun sərhədlərindən kənara çıxır və dünya gündəliyinin ön sıralarında yer alır.

Yaxın perspektivdə Türkiyə ilə Azərbaycan arasında ticarət dövriyyəsinin 15 milyard dollara qədər artacağı proqnozlaşdırılır. Son 3 ildə müşahidə edilən artım dinamikası tezliklə bu hədəfə çatılacağına inam yaradır.

Bu müddət ərzində ölkələr arasında ticarət dövriyyəsi 84% artıb. Əgər 2020-ci ildə iki ölkə arasında ticarət dövriyyəsi 4 milyard 160 milyon dollar olubsa, 2022-ci ildə bu göstərici 5 milyard 842 milyon dollara qalxıb. 2023-cü ildə isə artım tempi daha yüksək olub və 7 milyard 650 milyon dollara çatıb.

Orta Dəhliz çərçivəsində Mərkəzi Asiya respublikalarında nəqliyyat infrastrukturunun inkişafı Türkiyə ilə Azərbaycan arasında ticarət dövriyyəsinin daha sürətlə artmasına imkan yaradacaq. Avropa və beynəlxalq maliyyə institutları Avropa İttifaqı ilə Mərkəzi Asiya ölkələrinin arasında nəqliyyat infrastrukturunun inkişafına 10 milyard avro ayırıb.

İnfrastrukturun inkişafı Azərbaycan qovşaq olmaqla Mərkəzi Asiya ölkələri il Türkiyə arasında emal yönümlü ticarət həlqəsi yaratmağa imkan verəcək. Yəni bu ölkələrdən müəyyən xammal və yarımfabrikatlar idxal ediləcək, Azərbaycanda müəyyən emal prosesindən keçdikdən sonra Türkiyəyə ixrac ediləcək. Yaxud əksinə.

Azərbaycan bu emal yönümlü ticarət həlqəsinə dəstək məqsədi ilə xüsusi ixrac məqsədilə daxildə emal gömrük proseduru tətbiq edib. Yəni, ölkəmiz bu addımı ilə bütün Türk Dünyasının - Mərkəzi Asiyanın türk dövlətlərinin və Türkiyənin iqtisadi çiçəklənməsinə töhfə verir.

İqtisadiyyat professoru Mehmet Yüce bildirib ki, Azərbaycanın bu addımı ölkələrimiz arasında uzun illər boyunca formalaşmış «bir millət, iki dövlət» formatına uyğundur.Təbii ki, Orta Dəhlizin əsas həlqəsinin Azərbaycandan və Türkiyədən keçməsinin vacib səbəblərindən biri də təhlükəsizlikdir. Hər iki ölkə bu məsələyə xüsusi diqqət yetirir.

Asiya ilə Avropa arasında bir nəqliyyat körpüsü kimi Orta Dəhlizin aktuallaşması Rusiya - Ukrayan müharibəsindən sonra başladı. Amma qısa müddətdə baş verən asanlaşmalar və uyğunlaşmalar bu nəqliyyat marşurutunu digərləri ilə müqayisədə daha əlverişli mövqeyə çıxardı.

Beləliklə, 2023-ci ilin trendi kimi gündəmə gələn Orta Dəhliz Cənubi Qafqaz və Mərkəzi Asiya ölkələrinin iqtisadi həyatının ayrılmaz hissəsinə çevrildi.

© Real TV