Almaniyanın “Siemens” şirkətinin Avstriyadakı bölməsi "Bakı Metropoliteni" QSC-nin yenidən qurulacaq "28 May" yarımstansiyası üçün avadanlıqları ölkəmizə göndərib.

Valyuta.az bu barədə səhmdar cəmiyyətinə istinadən xəbər verir.

Məlumata görə, şirkətin rəhbərliyindən və texniki mütəxəssislərindən ibarət qrup Bakı metrosunda işgüzar səfərdə olublar. Son illərdə enerji sahəsində səmərəli əməkdaşlıq aparılan şirkətin təmsilçilərinin səfərində əsas məqsəd birgə layihələr əsasında istismara verilən qurğuların və avadanlıqların birgə monitorinqini keçirmək, proqram təminatını yeniləmək, həmçinin inşa edilən və yenidən qurulan obyektlərin təchizatı, eləcə də digər perspektiv planları müzakirə etmək olub.

“Siemens”lə əməkdaşlıq çərçivəsində “Nərimanov” elektrik deposunda 2 yeni, Qırmızı xətti qidalandıran bir dartıya, “İçərişəhər” və Bənövşəyi xəttin “8 Noyabr” stansiyalarında quraşdırılmış və ən müasir avadanlıqlarla təchiz edilmiş yarımstansiyalara baxış keçirilib. Şirkətin yerli nümayəndəliyinin əməkdaşlarının iştirak etdiyi görüşlərdə yarımstansiyalarda qurulmuş elektrotexniki avadanlıqların monitorinqi nəticəsində elektrik təchizatı avadanlıqlarının iş rejimi və keyfiyyəti də yoxlanılıb.

Qarşıdakı dövrdə icra olunacaq planlara əsasən, “28 May” yarımstansiyasının yenidən qurulması, tikilməkdə olan şərti adı “B-04” olan yarımstansiyanın təchizatı, proqram təminatı ətrafında texniki işlərin yekun mərhələsi üzrə işlər də diqqət mərkəzində olub.

“Bakı Metropoliteni”nin istismar üzrə baş mühəndisi Azad Mustafayevin rəhbərliyi ilə mütəxəssislər, “Siemens”in rəhbəriyinin nümayəndələri Hannes Rottvanql və Riçard Paynbauer, şirkətin Azərbaycan nümayəndəliyinin rəhbəri Azər Quliyevlə birgə müşavirələrdə aktual məsələlər, həmçinin gələcəkdə inşası nəzərdə tutulan və ən irimiqyaslı layihələrdən biri kimi “Dərnəgül” elektrik deposunun elektrik təchizatı ətrafında tövsiyə xarakterli təcrübə və fikir mübadiləsi aparılıb.

Səmərəli əməkdaşlığın daha bir nümunəsi yaxın dövrlərdə “28 May” yarımstansiyasının yenidən qurulması olacaq. Yarımstansiyanın qurğu və avadanlıqları artıq Azərbaycana yola salınıb. Onun tam fərqli formatda qurulması nəzərdə tutulub. Bu xüsusda dövrün artan enerji tələbatı, müasir standartların tələbləri və digər texniki məsələlər xüsusi nəzərə alınıb.