Ötən ilin mart ayından ənənəvi tədrisin dayandırıldığı ali təhsil müəssisələrinin auditoriyaları sentyabrın 29-dan tələbələrin üzünə açılacaq. Artıq tələbələr kirayə mənzil axtarışına çıxıblar. 
 

Bununla bağlı əmlak məsələləri üzrə ekspert Elnur Fərzəliyev açıqlamasında tələbələrin ev kirayəsi məsələsinin hər il ənənəvi olaraq problem halına çevrildiyini deyib:

"Keçən il dərslərin distant formada təşkili, tələbələrin geri dönüşü kirayə mənzil bazarında boşluq yaratdı. Amma indi gec də olsa, ali təhsil müəssisələrinin açılması ilə bağlı qərarın verilməsi ilə bu bazarda canlanma müşahidə ediləcək. Müddət azsır, tədrisin başlamasına 10-15 gün qalıb,  tələbələr artıqkirayə mənzil axtarmağa başlayacaqlar. Düzdür, bazarda kirayə evlər demək olar ki, az saydadır. Digər bir problem isə ondan ibarətdir ki, ev sahiblərinin çox hissəsi tələbələrə ev verilməsindən imtina edə bilər. Çünki onlar ötən ilki durumun yenidən təkrarlanmasından ehtiyat edirlər. Yəni tələbələr gəlib ev tutar, yenidən distant təhsilə keçid edilər və evlər boş qalar. Bu baxımdan mənzil sahiblərinin çoxu daimi müştəri tapmağa can atır - hansısa şəhər sakini və ya iş üçün paytaxta gələn adamlar... Bu problemin isə ildən-ilə artması gözlənilir”.

Müsahibimiz qeyd edib ki, xüsusən Bakıda pilot layihələrinin, söküntü-tikinti işlərinin aparılması köhnə, istismar müddətini bitirmiş binaların sökülməsi ilə nəticələnir, bu isə bahalılığa səbəb olur:

"Onların yerinə yeni binalar tikilir, burada isə, mənzilin qiyməti köhnə binadan iki dəfə çoxdur. Eyni zamanda Təbriz, Çapayev küçəsi, Yasamal, Sovetski və başqa ərazilərdə yerləşən həyət evlərinin sökülməsi ilə zamanla ucuz ev problemləri gündəmə gələcək. Yeni mövsümdə təkcə tələbələr deyil, bir çox xidmət sahələrinin işçiləri də şəhərə axın edir. Onların fəaliyyəti bir növ tələbələrlə bağlıdır. Məsələn, universitet ətrafındakı kafe-restoranlar, mağazalar, digər sahələr işə başlamaq üçün tələbələrin gəlişini gözləyirlər. Onların da çoxu kənarlardan gələn şəxslər olur. 

Problem odur ki, tələbələr məcburən artıq şəhər kənarına çıxacaqlar. Onlar vaxt itkisinə məruz qalacaq, yol xərcləri artacaq, avtobus və metrolarda ciddi sıxlıq müşahidə ediləcək. Bu baxımdan tələbənin qalacağı yer ali təhsil müəssisəsinə yaxın olsa, öz yataqxanaları tikilib təhvil verilsə, həm ev problemi aradan qalxar, həm də kirayə evlərdə qiymət artımı olmaz. Çünki kirayə evlərin böyük bir hissəsini tələbələr tutublar. Təəssüf ki, yataqxanalar məhdud saydadır. Əksər insanlar fərdi həyət evlərində yaşayırlar, həyətin içində bir neçə mənzil tikirlər və onu ucuz qiymətə tələbələrə kirayə verirlər. Tələbələrin gəlişinin bir müsbət tərəfi həmin aztəminatlı ailələrin dolanışığını qaldırması olacaq".

Mənbə: Sfera.az