Bakı metropoliteninin “Elmlər Akademiyası” stansiyasının hər iki yolu dəmir-beton bloklar üzərində qurulub. 

Metropolitendən Valyuta.az-a verilən məlumata görə, bu stansiyada həyata keçirilən bu innovativ yenilik xəttin başlanğıc və sonunda deyil, məhz orta sahələrində yerləşən stansiyalardan birində həyata keçirildiyindən metropoliten tarixində ən məsuliyyətli layihələrdən biri kimi yer alacaq.

Orada işlər köhnə ağac şpalların və yolun üstquruluş elementlərinin sökülərək çıxarılması, beton özülün dağıdılması ilə başlanıb. Daha sonra yeni yol yatağının texnoloji normalara müvafiq səviyyəyə gətirilməsi üçün işlər aparılıb. Bunlara paralel olaraq, beton qırıntılarının stansiya yollarından daşınaraq çıxarılıb, beton məhlulun stansiya yollarına ötürülməsi üçün boru xətti, suaxarların yönləndirilməsi üçün müvəqqəti tədbirlər və s. hazırlıq işləri görülüb.

İşlərin ikinci mərhələsi çərçivəsində əvvəlcə yolun hamar alt qatının beton təbəqəsi qurulub. Ardınca inşaatın norma və qaydalarına, eləcə də yeni yolun çəkilməsinin texnoloji proseslərinin tələblərinə uyğun olaraq, dəmir-beton konstruksiyaların yığılmasına başlanılıb. Konstruksiyalar qurularaq, üstquruluş elementləri düzüldükdən sonra yolun texniki-normativ tələblərə uyğunluğunu yoxlamaq məqsədilə diaqnostik müayinəsi aparılmaqla betonlama işlərinə başlanılıb.

İstehsal olunmuş dəmir-beton blokların və digər üstquruluş elementlərinin stansiyaya daşınması da mərhələlərlə başa çatdırılıb. Dəmir-beton bloklar Almaniyanın “Vollert” müəssisəsinin texnologiyalarından istifadə olunmaqla “Bakı Metropoliteni” QSC-nin öz istehsalat sahəsinin məhsuludur. 

Bu yollar qatarın daha rəvan və daha təhlükəsiz hərəkəti baxımından da üstün texnoloji yenilikdir.

“Elmlər Akademiyası” stansiyasında aparılan təmir-yenidənqurma işlərinin üçüncü mərhələsində relslərin qoyulması, üstquruluş elementlərinin yığılıb bərkidilməsi işləri aparılıb. 

Qeyd edək ki, burada yolun üst quruluşunun yığılmasında müasir sistemlərin tərkib hissəsi olan və səmərəli variant sayılan "Vossloh-300 UTS" tipli rels bəndləri tətbiq edilib. Təkrar diaqnostika müayinələri yeni yolun ideal vəziyyətdə olduğunu müəyyənləşdirib. Bu işlərin  yekunu olaraq, təmas relsi quraşdırılmaqla, stansiya yolunun estetik görkəmini təmin edən ətraf mühitin təsirlərindən də qoruyan rəngləmə işləri aparılıb.

Yekunda aparılan təmizik işlərindən sonra yeni yol qatarların hərəkəti şəraitində yoxlanılıb.

Stansiyada aparılan təmir-quraşdırma və bərpa prosesi Nazirlər Kabineti yanında Operativ Qərargahın “COVID-19” pandemiyası dövründə müəyyən etdiyi tələblər və normalara uyğun qaydada təşkil edilib.