"X" platforması "Premium+" abunəlik xidmətinin qiymətini 37,5% artıraraq, İlon Maskın (Elon Musk) platformanı 2022-ci ildə almasına qədər olan dövrün ən böyük qiymət artımını həyata keçirib.

Valyuta.Az "TechCrunch"a istinadla xəbər verir ki, ABŞ-da "Premium+" xidmətinin aylıq qiyməti 21 dekabrdan etibarən 16 dollardan 22 dollara yüksəlib. İllik abunəlik qiyməti isə 168 dollardan 229 dollara qədər artıb. Şirkət bu dəyişikliyi abunəçilərə təqdim olunan xidmətin dəstəklənməsi üçün etdiyini bildirib. Cari abunəçilər 20 yanvara qədər köhnə tariflərdən istifadə etməyə davam edəcəklər.

Beynəlxalq bazarlarda da oxşar qiymət artımları müşahidə edilir. Avropa İttifaqında "Premium+" xidmətinin aylıq qiyməti 16 avrodan (22 dollar) 21 avroya (23 dollar) yüksəlib. Kanadada isə qiymət 20 Kanada dollarından (15 ABŞ dolları) 29 Kanada dollarına (21 ABŞ dolları) çatıb.

Bəzi bazarlarda təsir daha böyük olub. Nigeriyada "Premium+" xidməti üçün istifadəçilər əvvəlki 7,300 ₦ (9 dollar) əvəzinə artıq 34,000 ₦ (43 dollar) ödəməli olacaqlar. Türkiyədə isə abunəlik dəyəri mövcud 300 ₺-dən (11 dollar) 770 ₺-yə (28 dollar) yüksəlib.

Platformanın əsas abunəlik xidmətinin qiyməti dəyişməyərək aylıq 3 dollar olaraq qalır.

Rəhim