“WhatsApp” və digər mesajlaşma proqramları necə pul qazanır?

“WhatsApp” istifadəçilərinin danışıqlarını bütün dünya üzrə məlumat mərkəzlərindəki serverlərdə şifrələnmiş şəkildə saxlayır. Bu çox bahalı əməliyyatdır. Bununla belə, istifadəçilər WhatsApp-a heç bir ödəniş etmədən platformadan istifadə edə bilərlər. Platformanın dünya üzrə təxminən üç milyard istifadəçisi var. 

Maraqlıdır, istifadəçilərə pulsuz xidmət edən “WhatsApp” necə pul qazanır?

Valyuta.az-ın məlumatına görə, “WhatsApp” texnologiya nəhəngi “Meta”nın tərkibindədir. “Meta” bu platformaya ayrıca üstünlük verir. Platforma fərdi istifadəçilərdən ödəniş tələb etməsə də, “WhatsApp” vasitəsilə istifadəçilərlə ünsiyyət qurmaq istəyən korporativ müştərilərdən pul qazanır.
Artıq bir müddətdir ki, şirkətlər “WhatsApp”da pulsuz kanallar açıb abunə olan hər kəsə mesaj göndərə bilirlər. Tətbiq vasitəsilə fərdi müştərilərlə həm söhbət edə, həm də iş əməliyyatları apara bilmək üçün pul ödəyirlər.

Bu xüsusiyyət hər ölkədə eyni şəkildə işləmir. İngiltərədə bu sahədə yeni addımlar atılsa da, Hindistanın Banqalor şəhərində insanlar “WhatsApp” vasitəsilə avtobus bileti ala, hətta yerlərini seçə bilirlər.

Şirkətlər həmçinin “Facebook” və ya “Instagram”da reklamın üzərinə kliklədikdə birbaşa WhatsApp söhbətini işə salan link üçün də pul ödəyirlər. “Meta”nın biznes mesajlaşma üzrə vitse-prezidenti Nikila Srinivasan deyir ki, bu xüsusiyyət artıq texnologiya nəhənginə "milyardlarla dollar" qazandırıb.

WhatsApp-dan başqa digər mesajlaşma proqramları necə pul qazanır?

Digər mesajlaşma proqramları fərqli üsullara üstünlük verir. Mesaj təhlükəsizliyi protokolları ilə tanınan “Signal” qeyri-kommersiya təşkilatıdır. O qeyd edir ki, “Telegram”dan fərqli olaraq investorlardan pul götürmür. “Signal” ianələr hesabına sağ qalır. 

Ümumiyyətlə gənc oyunçuların istifadə etdiyi və hazırda Türkiyədə qadağan edilən “Discord” kimi bir çox platformalar “freemium” modeli ilə işləyir. Belə ki, qeydiyyat pulsuzdur, lakin oyunlara giriş kimi əlavə funksiyalar ödənişlidir. “Nitro” adlı ödənişli üzvlük yüksək keyfiyyətli video axını və xüsusi emojilər kimi üstünlüklər təklif edir və ayda 10 dollara başa gəlir.

“Snapchat”ın arxasında duran şirkət “Snap” müxtəlif modelləri birləşdirir. O, həm reklam göstərir, həm də “Snapchat Spectacles” adlı əlavə reallıq eynəklərini satır.

“Snap”ın başqa bir gəliri faizdən gəlir. “Forbes”in məlumatına görə, o, 2016-2023-cü illər arasında təkcə faiz gəlirlərindən təxminən 300 milyon dollar qazanıb. Bununla belə, “Snap”ın əsas gəlir mənbəyi reklamdan gəlir. Bu, illik 4 milyard dollardan çox gəlir gətirir.

Mesajlaşmanın şifrəli və anonim olmasına baxmayaraq, proqramlar mesajların məzmununa baxmadan istifadəçilər haqqında çoxlu məlumat əldə edə bilər və bu məlumatlardan reklam satışı üçün də istifadə edə bilər.

Əvəz Həsənov