“Sosial şəbəkələrdə məqalələrin silinməsi geniş müzakirə olunmaqdadır. Bu mövzu ilə bağlı mənə də müraciət edənlər çoxdur. Təəssüf ki bu məsələdə dəstək ola bilmirəm”.

Bunu “Vikipediya” üzrə mütəxəssis Elnur Eltürk Valyuta.az-a bildirdi. 

Son dönəmlərdə Vikipediyada məqalələrin silinməsi gündəmdədir. Təkcə məqalələr deyil, fotolar da silinir. İnsanlar Azərbaycandakı “Vikipediya”nın işindən şikayətlənirlər. Məqalələrin niyə silindiyi istifadəçilərə məlum deyil. Elnur Eltürk deyir ki, məqalələrin silinməsinin bir neçə səbəbi var. Fotoların silinməsində isə səbəb müəllif hüquqlarıdır:

“Vikipediya”da məqalələr onun qaydaları çərçivəsində yaradılır. Mənbənin etibarlılığı, şəxsin nə qədər ensiklopedik olub-olmaması əsas rol oynayır. Şəxslərin ensiklopedikliyi ilə bağlı qaydalar var. İstifadəçilər məqalə yaradarkən qaydalara əməl etməlidirlər. “Vikipediya”nın qaydaları bunu tələb edir. Fəal istifadəçilər, inzibatçılar bu yanaşmanı dəstəkləyirlər. Məqaləniz bu qaydalara uyğun olmadıqda silinə bilər. Fotolar məsələsi müəllif hüquqları ilə bağlıdır. Müəllif hüququ bilinməyən fotolar silinir”.

E.Eltürk bildirir ki, bu məqalələrin silinməsinə o da təəssüf edir. Amma bununla bağlı əlindən heç nə gəlmir. O, tövsiyə edir ki, məqalələrin silinməməsi üçün istinadlara daha çox yer verilməlidir: 

“Mübahisə yaradacaq məqalələrin silinməsinin tərəfdarı olmasam da, həmin məqalələrin etibarlı istinadlarla təkmilləşdirilməsini dəstəkləyirəm. Bu zaman biz “Vikipediya”ya daha çox töhfə verə bilərik”.

Nuray