Dünyada enerjiyə olan tələbat əhəmiyyətli şəkildə artıb və gələcək tələbatların ödənilməsində akkumlyatorlar batareyalarının vacib rolu olacaq.

Bunu Əbu-Dabidə Dayanıqlılıq Həftəsinin (ADSW) açılış mərasimində nitqlə çıxış edən BƏƏ energetika naziri Süheyl Məhəmməd Əl Məzrui deyib.

“Akkumlyator batareyaları – dünyanın ən sürətlə inkişaf edən enerji texnologiyasıdır”, - deyə Əl Məzrui enerjinin saxlanılması istiqamətində innovasiyaların vacibliyini vurğulayıb.

O bildirib ki, cari ildə enerji sisteminə rekord 100 qiqavatt güc əlavə olunacaq. Bununla belə, nazir xəbərdar edib ki, xüsusilə süni intellektin hazırkı inkişaf səviyyəsini nəzərə alsaq, bu, dünyada enerjiyə artan tələbatın sadəcə cüzi bir hissəsini ödəyir.

“Süni intellekt peyda olana qədər elektrik enerjisinə olan tələbin 2035-ci ilə qədər 9000 qiqavatdan 15 000 qiqavatta qədər artacağı proqnozlaşdırılırdı. Amma istifadəsi aya yarım milyard ziyarətə qədər artmış və "Google" axtarışı ilə müqayisədə 10 dəfə daha çox enerji aparan "ChatGPT" kimi tətbiqlərə görə, 2050-ci ilə bu göstərici 35 000 qiqavatta çata bilər. Bu 250 faizdən çox bir artımdır”, - deyə nazir bildirib.

BƏƏ naziri problemin miqyasından söz açaraq, heç bir enerji mənbəyinin belə misli görülməmiş tələb səviyyəsini ödəməyə qadir olmadığını qeyd edib.

“Əminəm hər biriniz razılaşacaqsınız ki, heç bir eneji mənbəyi bu misli görülməmiş tələbatı ödəyə bilməyəcək”, - deyə Əl Məzrui vurğulayıb.

O, həmçinin, enerjiyə olan qlobal əlçatanlıq məsələsindəki qeyri-bərabərlikdən söz açaraq, “enerjinin bir milyard insan üçün hələ də əlçatan olmadığını” ictimaiyyətin diqqətinə çatdırıb.

Bunun üçün nazir beynəlxalq ictimaiyyəti artan enerji tələbatının ödənilməsi və onun əlçatanlığında olan boşluqların aradan qaldırılması üçün lazımi çeviklik və imkanlarla təmin edən geniş spektrli enerji həlləri tapmağa çağırıb.

Əl Məzrui dayanıqlı energetik gələcək naminə, şaxələndirmənin və texnoloji innovasiyaların, o cümlədən, akkumulyator batareyalarının və bərpa oluna bilən enerji mənbələrinin vacibliyini vurğulayıb.