“Azərbaycan Dövlət Neft Şirkəti (SOCAR) tərəfindən 2007-ci ildən etibarən İndoneziya istiqamətində ümumilikdə, 25 milyon tondan çox xam neft təchiz edilib ki, bunun da 24 milyon tonunu “Azeri Light” markalı neft təşkil edir”.

Valyuta.az xəbər verir ki, bunu Azərbaycanın energetika naziri Pərviz Şahbazov Azərbaycan ilə İndoneziya arasında enerji əməkdaşlığına dair Anlaşma Memorandumunun imzalanması mərasimində bildirib.

İki ölkə arasında ikitərəfli əlaqələrin inkişafında enerji sahəsində əməkdaşlığın rolundan bəhs edən nazir qeyd edib ki, enerji sahəsində tərəfdaşlıq əlaqələrimizin hazırda genişlənmək potensialı var:

“Azərbaycanın elektrik enerjisinin qoyuluş gücündə bərpa olunan enerjinin payını, təxminən, 1500 MVt artıraraq 30%-ə çatdırmaq hədəfi, xarici investorların cəlbi ilə əlaqədar görülən tədbirlər, xüsusilə də azad edilmiş ərazilərin “yaşıl enerji zonası” na çevrilməsi ilə bağlı planlar enerji əməkdaşlığının inkişafı üçün böyük imkanlar yaradır. Bu gün imzaladığımız bu sənəddə bərpa olunan enerji üzrə əməkdaşlıq istiqamətinin yer alması da enerji sahəsində işbirliyinin şaxələndirilməsini ehtiva edir”.

Pərviz Şahbazov sözünün sonunda, İndoneziyanın dövlət və özəl sektorunun maraqlı tərəflərini, potensial investorları “yaşıl enerji” sahəsində  əməkdaşlığa dəvət etdiyini diqqətə çatdırıb.

İndoneziyanın energetika və mineral ehtiyatlar naziri Arifin Tasrif isə bu sənədin imzalanması ilə ölkələr arasında enerji əməkdaşlığının inkişafının yeni mərhələyə daxil olduğunu söyləyib. 

Qonaq bidirib ki, qlobal miqyasda iqtisadi tənəzzüllə müşayiət olunan pandemiya innovativ, qeyri-standart planlar və strategiyalarla çətinliklərin öhdəsindən gəlməyi təşviq edir: 

“Həmçinin belə bir mürəkkəb vəziyyətdə enerji sahəsi də daxil olmaqla beynəlxalq əməkdaşlığın gücləndirilməsi də vacib amilə çevrilir. İnanıram ki, İndoneziya ilə Azərbaycan arasında enerji əməkdaşlığı daha yüksək səviyyədə inkişaf edərək, hər iki ölkəyə qarşılıqlı fayda gətirəcək”.