“Kimlərinsə ölkədə orqanik gübrələrdən istifadənin statistikasının apardığına inanmıram. Çünki müşahidə edirəm ki, son illər kənd təsərrüfatında heyvandarlıq sektorunun tullantılardan istifadə genişlənib. Ona görə də ölkədə orqanik gübrələrdən istifadə faizi daha çoxdur”.

Bu sözləri Valyuta.az-a iqtisadçı Akif Nəsirli kənd təsərrüfatında orqanik gübrədən istifadənin statistikası haqqında danışarkən deyib. 

Akif Nəsirli qeyd edib ki, bu sahənin inkişafı üçün ilk növbədə orqanik gübrə istehsalını ölkənin daxilində təşkil etmək lazımdır:

“Hazırda biz xarici ölkələrdən aldığımız gübrələrdən istifadə edirik, ölkə daxilində isə yalnız gübrə kimi fermerlər arasında “silitra” kimi tanınan ammonium şorası istehsal olunur. Azərbaycanda orqanik gübrədən istifadə edən varsa, onlar da bunu xarici ölkələrdən ixrac edir”.

Ekspertin sözlərinə görə, orqanik gübrələrdən istifadə edilməsi üçün kənd təsərrüfatının heyvandarlıq sektoru sürətlə inkişaf etdirilməlidir:

“Çünki orqanik gübrənin xammalı elə heyvandarlıqla bağlıdır. Heyvanların tullantıları ən yaxşı orqanik gübrə rolunu oynaya bilər. 

Məsələn, mən Helsinki şəhəri kanalizasiyasının Baltik dənizinə axıdılan hissəsində görmüşəm ki, şəhərin bütün kanalizasiyası həmin əraziyə axıdılır. Bu axıntılar həmin ərazidə içməli su səviyyəsinə qədər təmizlənir. Həmin qurğular kiçik şəhərcik formasında salınıb. Hətta bloklar arasında ərazi böyük olduğu üçün  avtobuslar da işləyir. Ayrılan tullantılardan həmin qurğunun işlənməsi üçün lazım olan elektrik enerjisinin yarısı alınır. Tullantıdan alınan qalıqlar bir anbara yığılır və onlar qıcqırdılaraq onlardan qaz, qazdan isə elektrik enerjisi alınır. Sonrakı mərhələdə həmin anbardakı qalıqlardan xüsusi gübrələr hazırlanır və baha qiymətə satılır. Həmin qurğunun xərclərinin 75 faizi kanalizasiya tullantılarından alınanlarla maliyyələşir. 

Bu cür sistemlərdən istifadə etmək mümkündür. Doğrudur, mentalitetə görə bəlkə bizdə bundan istifadəe etmək mümkün olmasın. Lakin heyvandarlığı inkişaf etdirib, onların tullantılarından həm qaz almaq, sonrakı mərhələdə isə həmin tullantılar emal edilərək bir il ərzində orqanik gübrəyə çevrilə bilər”. 

Davud