Azərbaycan Mərkəzi Bankının Kredit təşkilatlarının fəaliyyətinə nəzarət departamentinin şöbə rəisi Xəyyam İsmayılov Bakıda keçirilən "Dayanıqlı mikromaliyyə üçün innovativ həllər" mövzusunda Azərbaycan Mikromaliyyə Konfransında bildiribki, AMB ölkədə məsafədən kreditləşmənin tənzimlənməsini planlaşdırır.

Xəyyam İsmayılovun sözlərinə görə, bu istiqamətdə beynəlxalq təcrübə araşdırılır və yerli prioritetlər nəzərə alınmaqla məsafədən kreditləşmənin ümumi şərtləri müəyyən ediləcək. Burada əsas məqsəd isə istehlakçıların hüquqlarının qorunması və onların izafi borclanmasının qarşısının alınmasıdır.

Mövzu ilə bağlı Valyuta.az-a danışan bank məsələləri üzrə ekspert Əkrəm Həsənov bildirib ki, hazırda da Asan İmza və elektron imzadan istifadə etməklə, banka getmədən kredit verilməsi var. Lakin Mərkəzi Bank indi bunu etməklə şərtləri tənzimləmək istəyir:

“Hesab edirəm ki, bu doğru qərar olacaq. Çünki belə kredit verilərkən müxtəlif problemlər yaranır”. 

Ekspertin sözlərinə görə, bu kreditlərlə bağlı həll olunmalı iki problem var: 

“Birincisi, kredit verərkən əmin olmaq lazımdır ki, Asan İmzadan kredit götürən şəxsin özü istifadə edir. Çünki ola bilər ki, elektron imza kiminsə adına olsun, amma həmin an başqasının əlinə keçmiş olsun. 

Əgər bu iş məhkəməyə qədər gedib çıxarsa, bu zaman elektron imza sahibi krediti onun götürmədiyini deyə bilər. Bunun qarşısını almaq üçün isə video zənglə həmin şəxsin imza sahibi olduğunu təsdiqləmək lazımdır. 

İkincisi isə, kredit götürən şəxsə bütün şərtlərin izah olunmasıdır. Belə ki, vətəndaş bankdan kredit götürərkən, ona bank işçiləri tərəfindən şərtlər yerində izah olunur. Amma məsafədən kredit götürən şəxs şərtləri düzgün anlamadığını deyə bilər. Ona görə də belə kreditlər verilərkən həmin şəxslərə bir-bir və düzgün izah edilməlidir ki, tərəflər arasında problem yaranmasın. Ona görə də məsafədən kreditin verilməsi ilə bağlı şərtlər tənzimlənməlidir”. 

Davud