Xəbər verdiyimiz kimi, “Kredit büroları haqqında” edilən dəyişikliyə görə, kredit tarixçəsi subyektlərinin (barəsində kredit tarixçəsi formalaşdırılan fiziki və ya hüquqi şəxsin) kredit tarixçələri ilə bağlı məlumatları razılıq almadan təqdim edən məlumat təchizatçılarının sırasına mobil telefon operatorlarının daxil edilir. Bu, kredit təşkilatlarından kredit götürmək üçün müraciət edən şəxslərin ödəmə qabiliyyətini və borc öhdəliklərinin icra intizamını qiymətləndirmək imkanını artıracaq.

Bəs bu qanuna dəyişikliyə ehtiyac var idimi, dünya təcrübəsi nə deyir?

Valyuta.az-a danışan bank eksperti Əkrəm Həsənov deyir ki, dünyada kredit tarixçəsi dedikdə bütün kreditlər nəzərdə tutulur. Bu, yalnız Azərbaycanda idi ki, banklar və bank olmaya kredit təşkilatlarının kredit tarixçəsinə baxılsın:

“Sonra bu siyahıya pərakəndə ticarət şəbəklərini daxil etdilər. Bizdə uzun müddətdir planlaşdırılırdı ki, bu siyahıda bütün kreditlər olsun. Yəni, kredit tarixçəsi ona görə lazımdır ki, kredit götürənə etibar etmək olar, yoxsa yox? Bu nöqteyi-nəzərdən bu qanuna dəyişiklik edilməsi çox düzgündür ki, problemli kreditlər azalsın”.

Ə.Həsənov mobil operatorlardan kredit götürüb vaxtında ödəməyən şəxslərə bankların kredit verib-verməməsindən də danışıb. Ekspert vurğulayıb ki, kredit tarixçəsinin mənfi olması o demək deyil ki, bank kredit verməyəcək və ya verilən kreditin məbləği çox olacaq. Bu sadəcə məlumatdır:

“Ola bilər ki, banklar bu kredit tarixçəsini əsas gətirərək kredit verməyə bilər. Bizdə insanlar elə düşünür ki, kredit tarixçəsi pisdirsə, bank kredit verməyəcək. Bu, böyük ehtimalla elədir. Amma ola bilər ki, başqa girov əsasında və ya hansısa şəxsin zaminliyi əsasında bank kredit verəcək. Bu, bank sadəcə üçün məlumatdır ki, kredit verdiyi adamı daha yaxından tanısın. Sözsüz ki, kredit tarixçəsi yaxşı olan şəxslərə daha çox kredit verilə və ya kredit tarixçəsi pis olan şəxslərə daha az kredit verilə, hətta heç verilməyə də bilər”.

Əvəz Həsənov