Qrup halında işləməyi sevməyən şəxslər digər iş yoldaşlarından müəyyən sahələrdə geridə qalırlar. Məsələn, digərləri qrup halında bütün sahələri müzakirə edən zaman bu insanlar tək hər işi çatdıra bilmirlər, bu zaman da ortaya tam iş qoya bilmirlər. Xüsusilə də, komanda halında işləməyə çətinlik çəkirlər. Bu da, onların komandadan geri qalmasına səbəb olur.

Burada ən əsas faktor həmin insanların ünsiyyət problemlərinin olmasından irəli gəlir. 

Ümumiyyətlə, kollektivə qarışa bilməyən, ünsiyyət qurmağda çətinlik çəkən şəxslərin  gördükləri işin kefiyyəti necə olur? Onların bu xüsusiyyəti işin keyfiyyətinə necə təsir edir?

Valyuta.az-a danışan HR Hunter şirkətinin qurucusu, İnsan Resursları üzrə konsultant İlkin Mirzəzadə deyir ki, bu məsələ fərdlərə görə dəyişə bilir:

“Bəzi şəxslər var ki, onlar üçün komanda şəklində işləmək çətindir. Həmin şəxsin potensialına baxmaq lazımdır ki, həqiqətən də, komandada işləmək onun üçün çətindir, yoxsa bu, sadəcə bir bəhanədir. Elə işçilər var ki, sakitçiliyi sevir, tək işləməyi xoşlayır, hətta bəzən olur ki, başqa otaqlara çəkilərək yalnız işləməyi seçirlər. Amma potensialından asılı olmayaraq mütləq komanda ilə işləməyə bacarmaq lazımdır. Çünki hər hansı bir proyektdə mütləqdir ki, həmin şəxs komanda ilə işləməyə məcbur qalacaq. Buna görə də, komanda halında işləməyi öyrənmək çox əhəmiyyətlidir”. 

Konsultant onu da qeyd edib ki, tək işləməyi seçən şəxslər kollektivdən ayrılan zaman bəzi hallarda problemlər yaşayırlar:

“Məsələn, işçi iş yerini tərk edən zaman onun çox əhəmiyyətli işlər görmədiyi deyilir. Həmin şəxs yaxşı işlər görsə belə, kollektiv arasında çox görünmədiyi üçün yadda qalmır. Belə problemlər yarana bilir, amma ümumi götürən zaman ciddi problemlər olmur”.

Əvəz Həsənov