Yeni işə başlayanların şirkətlər qarşısında hansı tələbləri olur?
Bir çox işçilər iş yerini seçən zaman maaşa, iş ortamına, iş yoldaşlarına, iş yükünə və s. diqqət yetirirlər. Onları aldıqları maaşla yanaşı, iş prosesi də maraqlandırır. Yeni işə başlayan işçinin bunlar ilə maraqlanması normal haldır. Bəzən yeni başlayan işçilərin də şirkət qarşısında müəyyən tələbləri olur. İşə yeni başlayan işçilər əsasən hansı tələbləri irəli sürürlər?
Bu barədə Valyuta.az-a danışan Beynəlxalq Əmək Təşkilatının rəsmi təlimçisi, insan resursları mütəxəssisi Saleh Həsənov deyir ki, yeni işə başlayan şəxsləri uzunmüddətli karyerası olanlar və yeni karyeraya başlayan şəxslər olaraq bölmək olar:
“Daha uzun müddət karyerasını qurmuş, peşəkar mütəxəssislər yeni işə başlayanda həmin şirkəti araşdırırlar və həmin şirkət haqqında məlumatlı olurlar. Digər əməkdaşlardan, şirkətdən və ya netvorkinq vasitəsilə şirkət haqqında məlumat alırlar və bir çox məsələlərdə əmin olurlar. Həmin şirkətin neqativ şərtlərini də nəzərə alaraq konkret şərtlər irəli sürürlər. Davamlılıq, həmin şirkətlərdə olan motivasiya imtiyazları da onların nəzərində olur. Daha peşəkar namizədlər sığorta, nəqliyyat təminatı, istirahət imkanları və s. kimi istəkləri olur”.
Mütəxəssisin sözlərinə görə, yeni işə başlayanlar xüsusilə də, gənclərin diqqət etdiyi məqamlar var:
“Yeni işə başlayan gənclər daha çox əmin olmağa çalışırlar ki, bu iş yerində uzun müddət çalışmaq imkanı varmı? Onlar həm də yeniliklər baxımından güvən istəyirlər. Bunlarla yanaşı, hər kəsin istədiyi əməkhaqqının vaxtında verilməsidir. Kollektivi və şirkətin brendinq məsələsini vacib sayırlar. İnsanlar istəyirlər ki, brendinqi daha yaxşı olan şirkətlərdə işləsinlər. Çünki bu, onların karyerasının ayrılmaz hissəsi olacaq. Ondan tələb olunacaq işin daha konkret olaraq bildirilməsini istəyirlər. Əvvəllər vəzifə təlimatına xüsusi diqqət verilmirdisə, indi əməkdaşlar mütləq şəkildə vəzifə təlimatlarına, vəzifə təlimatlarının nələri əhatə etməsinə və s. baxırlar. Bu da çox yaxşı haldır”.
Əvəz Həsənov
Mətndə səhv varsa, onu qeyd edib ctrl + enter düyməsini basaraq bizə göndərin.
Son xəbərlər
Ən çox oxunanlar
- Bu gün
- Bu həftə
- Bu ay