Şirkətin böyüməsinə və ya kiçilməsinə görə şirkətlər ofislərini dəyişməli olurlar. Bu da bəzi hallarda işçilərdə narahatlıq yaradır. Yeni ofisin şəraiti əvvəlkindən yaxşı olmadıqda və ya ofis işçilərə uzaq məsafədə olduqda, xüsusilə narazı olurlar. Ümumilikdə isə, ofis dəyişəndə, işçilərin bir qisminin işləməyə bir müddət həvəsləri olmur. Yeni ofisə adaptasiya olmaları müəyyən qədər vaxt alır. Ofisin köçürülməsi işçinin performansına necə təsir edir?

Valyuta.az-a danışan HR Hunter şirkətinin qurucusu, İnsan Resursları üzrə konsultant İlkin Mirzəzadə deyir ki, şirkət böyüyürsə, daha böyük ofisə keçilməsi və kiçilən zaman da xərcləri daha da azaltmaq baxımından daha kiçik ofisə keçilməsi normal haldır:

“Burada əsas fikir verilməli olan məsələ hər kəsin ofisə asanlıqla gələ bilməsini təmin etməkdir. Təbii ki, bu, əvvəlki ofisə daha yaxında yaşayan işçilər üçün problem olur. Amma burada ümumi işçilərin 80-85 faizinin razılığı olmalıdır. Çünki biz bütün işçiləri razı sala bilmərik. Əgər şirkət kiçikdirsə, bütün işçilər razı salmaq olar, lakin orta və böyük şirkətlərdə hər kəsi razı salmaq olmur. Buna görə də, burada əsas şirkətin xərclərinə, ofisin infrastrukturuna və seçilən ofisin ərazisinin uyğun olması əsas faktorlardandır. Ofislərin metro, avtobus xətlərinə yaxın olması da vacibdir. Amma bu da fərdi həll olunan məsələdir. Əlavə olaraq, əgər şirkət premium xidmət təşkil edirsə, mütləq şəhərin mərkəzində olmalıdır. Çünki mərkəzdən kənarda xidmət göstərən premium şirkətlərdən istifadə edən olmur”.

İ.Mirzəzadə deyir ki, işçilərin yeni ofisə keçid dövründə adaptasiya müddəti, adətən, bir ay vaxt alır: “İşçilər yeni ofisə vərdiş edəndən sonra köhnə ofis də tədricən unudurlur. İşçilərin performansına təsiri müsbət və mənfi ola bilər. Təbii ki, daha yaxşı şəraitli ofisə köçmək işçinin performansına müsbət təsir edir. İşçinin performasına o zamanda mənfi təsir edər ki, işçi onsuz da şirkətdən narazı idi və ofisin dəyişməsi də ciddi səbəb olmadı. İşçinin yol məsafəsini çoxalması da işçinin performansına mənfi təsirləri ola bilər. Amma şirkət işçiyə müsbət dəyərlər qatırsa, bu zaman çox da mənfi təsirlər olmur”.

Əvəz Həsənov