“Sığorta yığımları artan zaman sığorta ödənişləri də ona paralel olaraq artır. Çünki bu riskdir. Riski də nə qədər çox sığortalasaq, o qədər çox ödəniş artır”

Bu sözləri Valyuta.az-a sığorta məsələləri üzrə ekspert İlkin İbrahimov sığorta ödənişlərinin artmasının səbəbləri haqqında danışarkən deyib. 

 Ekspert deyir ki, bir əmlak sığortalanırsa, orda sığorta hadisəsi olma ehtimalı da yaranır. Həmin bu məsələlərlə bağlı sığorta yığımları çoxalır, sığorta ödənişləri də daha çox artır:

“Hazırda sığorta ödənişlərinin artmasına bir səbəb fəsillərlə bağlıdır. Məsələn, qışda yanğın hadisələri daha çox olur, xüsusi ilə ötən il sığorta ödənişlərinin 5 dəfə artmasına səbəb “Azərsun” Holdinqdə baş verən yanğın zamanı ödənilən kompensasiyadır. Belə ki, həmin Holdinqə 40 milyon manata kimi sığorta kompensasiyası verdilər. Həmin məbləğ ölkə tarixində sığorta hadisəsi ilə bağlı ən böyük sığorta kompensasiyası idi”. 

“Sığorta ödənişləri ayrı-ayrı hesablanmır. Bunlara isə sığorta hadisəsi deyilir. Sığorta hadisəsi də daşınmaz əmlakla bağlı hadisələr nəzərdə tutulur” – həmsöhbətimiz əlavə edib. 

İlkin İbrahimov deyib ki, Mərkəzi Bank hər ay, hər il sığorta ödənişlərinin statistikasını açıqlayır:

“Bu il ilk dəfə sığorta yığımları 1 milyard manatı keçib. Artıq bir neçə ildir Azərbaycanda sığorta ödənişlərində, sığorta yığımlarında 20 faiz artım gözə çarpır. Bu da çox böyük göstəricidir və onu göstərir ki, sığorta ilə bağlı məsələlərdə hər il inkişaf var. Bu göstəricilərin artmasının birinci səbəbi qiymətlərin artması, risk faktorlarının artması ilə bağlı məsələlərdir. Məsələn, həyat sığortasında artıımlar özünü daha çox göstərir. İnsanlar da daha çox maarifləndikcə sığortaya inanmağa başlayır, öz risklərini daha çox sıığortalamağa çalışırlar. Sığortaya inam isə o vaxt yaranır ki, vətəndaşlar sığorta hadisələri ilə bağlı kompensasiya ala bilsin. Bütün dünyada da belədir ki, sığortanın bir nömrəli reklamı sığorta ödənişləridir”. 

Davud