“Bu keçmişdə bazar qaydalarından formalaşan bir məsələdir. Həmin vaxt müştərilər hər şeyin dadına baxır, sonra alırdılar”. 

Bunu Valyuta.az-a açıqlamasında marketoloq Pərviz Əzimov “müştərilər marketdə aldıqları açıq qidaların, çərəzlərin dadına baxa bilərmi” sualına cavab verərkən deyib. 

Pərviz Əzimov deyib ki, müştəriyə bununla bağlı haqq tanınmır. Müştəri məhsulun dadına baxa bilməz:

“Biznesdə bu doğru görünmür ki, müştəri gəlsin, istədiyi məhsulu seçəndə dadına baxaraq qərar versin ki, alıram ya yox. 

Zaman-zaman qida şirkətləri, xüsusilə ət və ət məhsulları istehsal edən şirkətlər marketlərdə öz məhsullarını daddırma aksiyası keçirir. Yəni müştərinin qidaların dadına baxmağı bu formada tənzimlənir”. 

“Bəs belə olan halda market əməkdaşları bununla bağlı nə edə bilər” sualına cavab olaraq marketoloq bildirib ki, market əməkdaşının müştəriyə hər hansı cəza tətbiq etmək hüququ yoxdur:

“Onlar ehtiyac olduğu təqdirdə polis çağırmalıdır. Marketdə olan polis rəsmi mühafizə polisi deyilsə, ümumiyyətlə, ixtiyarı yoxdur. Bu tənzimlənməlidir. Amma vətəndaşın da haqqı yoxdur ki, çərəzdən ya başqa məhsuldan götürüb dadına baxsın”. 

Pərviz Əzimov deyib ki, marketlərdə az gələn ərzaqlara görə  sonradan market idarəçisi cəzalandırılır:

“Düzdür, bəzən icazə əsasında market individual yanaşa, deyə bilər ki, pendirin, kolbasa məhsullarının dadına baxmaq istəyirsinizsə, buyurun dadına baxın:

Amma marketlər bu məhsulun çəkisinə görə ödəniş edir. Marketdə sayım olur, iki-üç aydan bir məhsullar sayılır. Sayım zamanı azlıq olarsa, marketin idarəçisi kimdisə, o günahlandırılır. Ona görə də vətəndaş da bunu bilməlidir ki, əgər hər müştəri yediyi şokaladdan sabah az çıxsa, marketin adminstratoru cərimələnəcək. Ona görə də bu kimi məsələlərdə vətəndaşlar da ehtiyatlı olmalıdır. Çünki qarşı tərəf buna görə məsuliyyət daşıyır”. 

Davud