"Sığorta sistemi ilə bağlı belə məlumat mərkəzinin yaradılması aktual və vacib məsələdir. Bildiyim qədərilə ölkədə bununla bağlı startup ideyası var. Bu məlumat bazasının Türkiyə və digər ölkələrlə ortaq yaradılması isə daha yaxşıdır".

Bu sözləri Valyuta.az-a sığorta məsələləri üzrə ekspert İlkin İbrahimov Azərbaycanla Türkiyənin ortaq yarada biləcəyi Sığorta Məlumat Mərkəzi haqqında danışarkən deyib. 

İlkin İbrahimov deyib ki, dünyanın inkişaf etmiş ölkələrində, Qərbi Avropada, Amerikada sığorta məlumatlarının toplanması çox önəmlidir: 

"Türkiyədə bu informasiyanın alınması pullu şəkildə həyata keçirilir. Avropanın bəzi ölkələrində bu xidmət pullu, bəzilərində isə pulsuzdur. Məsələn, bu ölkələrdə avtomobil alan zaman onun ban nömrəsi ilə müvafiq sayta ödənişli və ya ödənişsiz formada daxil olaraq həmin nəqliyyat vasitəsi haqqında məlumatlar əldə edilir. Bu məlumatlara avtomobilin nə vaxt qəza törətdiyi, qəza zamanı hansı hissələrinin ziyan çəkməsi barədə bilgilər daxil olur. Yəni məlumat bazasında avtomobillərlə bağlı dolğun faktlar əldə etmək mümkündür".

Ekpsert qeyd edib ki, ölkəmizdə 2012-ci ildən sonra İcbari Sığorta Bürosunda avtonəqliyyat vasitələrinin mülkü məsuliyyətinin icbari sığortasına bağlı olaraq bütün avtomobillər sığortalanıb:

"Qəza hadisəsi baş verəndə, sığortada qeydiyyata düşübsə, bu zaman İcbari Sığorta Bürosunda həmin avtomobillər haqqında məlumatlar qeyd olunur. Hazırda da İcbari Sığorta Bürosunda da o məlumatlar var. İndi isə Türkiyə və Azərbaycanla bağlı bu məlumatların inteqrasiya olunması ilə İcbari Sığorta Bürosu bu məlumatları da görə biləcək. İcbari Sığorta Bürosu yaşıl kart vasitəsi ilə Türkiyədə qəza törədən avtomobillər haqqında məlumatlarla da tanış ola bilir".

İlkin İbrahimov deyib ki, məlumat mərkəzinin yaradılmasının sığorta sisteminə faydası var:

"Məsələn, Mərkəzi Bankın Mərkəzi Kredit Reysteri var ki, bütün kredit götürənlərin informasiyası orda toplanır. Hansısa bankdan kredit götürən zaman bank sorğu verir və bazada olan bütün məlumatları əldə edir".

"Sığorta Məlumat Mərkəzində yerləşdirlən məlumatlar vətəndaşlar üçün əlçatan ola bilərmi" sualına cavab olaraq ekspert bildirib ki, bu məlumatların açıq olub-olmaması Mərkəzi Bankın qərarından asılı olacaq:

“İcbari Sığorta Bürosunda avtomobillərlə bağlı olan məlumatlar hazırda vətəndaşlar üçün əlçatan deyil. Bu məlumatların əldə olunması üçün proqram olmalıdır, bu proqram vasitəsi ilə də icazə verilməlidir. Çünki həmin informasiyaların məxfi olması, şəxsi xarakter daşıyıb-daşımaması məsələsi həll olunmalıdır ki, vətəndaşlar üçün də əlçatan olsun. Sığorta Məlumat Mərkəzində adətən avtomobillərlə bağlı məlumat olur. İcbari Sığorta Bürosounun fəaliyyətinə nəzər yetirsək görərik ki, burda bütün icbari sığorta növü üzrə sığortalanma ilə bağlı məlumatlar var. Məsələn, sistemdə daşınmaz əmlak üzrə də hansı sğıorta hadisəsinin olub-olmaması nəzərdə tutulur. Və yaxud həyat sığortası alan vətəndaş haqqında, aldığı kompensasiya haqqında məlumat qeyd edilir. Bu məlumatlar da Sığorta Məlumat Mərkəzinə yüklənə bilər”. 

Qeyd edək ki, Azərbaycanda Türkiyənin dəstəyi ilə Sığorta Məlumat Mərkəzi yaradıla bilər. Bu barədə "Report"a Bakıda keçirilən dənizçilərin sığorta sahəsində maariflənməsinə həsr edilmiş konfransda iştirak edən Türkiyə Sığorta İnstitutu Vəqfinin sədri Mehmet Kalkavan bildirib.

Davud