"Unun daxili bazarda 3-4% qiymətinin bahalaşması çörəyin qiymətinə heç bir təsiri olmayacaq".

Bunu Valyuta.az-a açıqlamasında iqtisadçı ekspert Xalid Kərimli deyib. Onun sözlərinə görə, ötən ilin iyul ayından unun qiyməti ucuzlamağa başlayıb:

"Bu ilin iyun ayında "taxıl sazişi"nin dayanması, Ukrayna taxılının dünya bazarına çıxarılmasında çətinliklər yaşanması, qiymətlərin bahalaşması ilə bağlı gözləntilərini artırsa da, bu reallaşmadı. İyul ayında dünya bazarında buğda qiymətləri 2,6% qalxsa da, avqust-sentyabr aylarında ucuzlaşma oldu. Sentyabr statistikasında buğda qiymətləri 1,6% ucuzlaşıb. Biz biz taxılın 90%-dən çoxunu Rusiyadan idxal edirik. Orada məhsuldarlıq həddən artıq yüksəkdir və sentyabr ayında Rusiyada məhsuldarlığın yüksək olması səbəbindən qiymətlər 1,6% aşağı düşüb".

Xalid Kərimli qeyd edib ki, unun qiyməti artsa da, belə çörəyin qiymətinə təsiri olmayacaq:

"Unun bir il ərzində 30%-dən çox ucuzlaşması var. Çörək qiymətində cüzi ucuzlaşma var. Un istehsal edən şirkətlərin imkanı var ki, bu kiçik artımı öz gəlirləri hesabına kompensasiya etsinlər".

Aylin