Bir çox hallarda müəyyən seminarlar, təlimdə iştirakdan öncə çox adam sertifikat verilib-verilməyəcəyini maraqlanır. Bunu soruşmaqda məqsəd CV-yə əlavə etməkdir. Bu gün istəklərdən dolayı sertifikat verilməsi halı da çoxdur. Belə  bir sual yaranır ki, bu sertifikatlar həqiqətən də bizə işə qəbul zamanı faydalı olacaq?

UNEC-in müəllimi, “Mazarina Trade Company”də İnsan Resursları şöbəsinin direktoru Saleh Həsənov deyir ki, sertifikat sayı yox, şəxsin həmin seminar və təlimlərdə nə qazandığı önəmlidir: “Təbii ki, namizədin təlim, seminar və konfranslarda iştirak etməsi, sertifikatları onun aktivliyinin, işə olan marağının göstəricisidir. Lakin sertifikat sayı işə götürmək üçün əsas deyil. Burada həlledici məqam həmin təlimlərdən nə öyrəndiyi və həmin təlimlərdən sonra həyatında nə kimi dəyişikliklər etdiyidir. Əks halda aldığı sertifikatlar sadəcə kağız parçasından başqa bir şey deyil”.

Saleh Həsənovun sözlərinə görə, insan resursları mütəxəssisləri şəxsin həmin təlimlərdən yeni nə isə öyrəndiyini və ya həyatında tətbiq edə bildiyini özünəməxsus üsulla yoxlayırlar: “Müxtəlif, test və situasiya tipli suallarla, müəyyən testlərlə bunu müəyyənləşdirirlər. Məsələn, müsahibəyə gecikən birinin vaxtın idarə olunmasından məlumatlı olması və təlimlərdə nə isə öyrəndiyi şübhə altındadır, yaxud müxtəlif çarpaz suallarla bunu müəyyən etmək mümkündür”.

Saleh Həsənov əlavə etdi ki, sırf sertifikat olsun deyə sertifikat almağın mənası yoxdur: “Marağın olduğu, ixtisaslaşmaq istədiyin sahə üzrə sertifikatlarının daha çox olmasının işə qəbulda kömək etməsi mümkündür. Sadəcə, müxtəlif sahələr üzrə kəmiyyət baxımından sertifikatın çox olması bir məna daşımır. Ola bilər ki, netvörkinq qurmaq, ünsiyyət qabiliyyətini yaxşılaşdırmaq, şəxsi inkişaf üçün kömək edir. Sırf işə qəbulda baxılan sertifikatlar əsasən işində lazım olan yönlə bağlı olur”.

Qarakişi Vəlizadə