“Rusiya-Ukrayna arasında “Taxıl sazişi"nin ləğvi elə bir ciddi taxıl böhranına səbəb olmayacaq”.

Bu sözləri Valyuta.az-a Liberal İqtisadçılar Mərkəzinin sədri Akif Nəsirli Rusiyanın “Taxıl sazişi”nin uzuadılmayacağı ilə bağlı verdiyi açıqlamanı şərh edərkən deyib. 

İqtisadçı qeyd edib ki, dünya artıq taxıl sazişinin dayandırlması ilə bağlı sanki bir immunitet formalaşıb:

“Artıq il yarımdan çoxdur ki, Rusiya-Ukrayna arasında müharibə gedir və bu müharibənin uzanma ehtimalları da çoxdur. Dünyada son illər həm taxılın qiymətinin bahalaşması, həm də Ukrayna taxılının ixracındakı risklər də nəzərə alaraq xüsusi ilə ərzaq buğdası istehsalı artırılıb. Təkcə Rusiya öz taxıl istehsalının həcmini 18, Hindistan 20 faizdən çox artıra bilib".

İqtisadçı qeyd edir ki, həmin artımlar və iki ildə taxıl məhsuldarlığının çox olması dünya bazrında Ukraynanın təsirlərini kompensasiya edə bilər:
 
"Hesab edirəm ki, taxıl sazişi uzadılmasa belə, dünya bazarında bir o qədər də ciddi bahalaşma müşahidə olunmayacaq”. 

Həmsöhbətimiz əlavə edib ki, əgər taxıl sazişi uzadılsa, ərzaq buğdasının qiyməti bir qədər də aşağı düşəcək:

“Çünki dünyada kifayət qədər izafi ərzaq buğdası var. Məsələn, Azərbaycan yola saldığımız yarım il ərzində ötən ilə nisbətən 25 faiz çox ərzaq buğdası idxal edib. Taxıl sazişinin ləğv edilməsi düşünürəm ki, Rusiyanın özünə də ziyandır. Çünki Ukryana sata bilməyəcək taxıllarını, müharibə bitəndən sonra isə bu rezerv qalan taxıl satılsa, dünya bazarlarında taxıl yüz dollara qədər ucuzlaşacaq. Bu halda Rusiya özü də taxıl istehsalçısı kimi itirəcək”.

Davud