“Azərbaycan sahibkarları Türkiyədən məhsulu lirə ilə alırlarsa, məntiqlə Azərbaycanda onun dəyəri ucuzlaşmalı, qiymət idxal ölkəsi olaraq bizə sərf eləməli idi”. 

Bunu Valyuta.az-a açıqlamasında iqtisadçı alim Nazim Bəydəmirli "Azərbaycanda Türkiyə məhsulları ucuzlaşacaqmı" sualına cavabında deyib. O, Türkiyənin Azərbaycanın əsas ticarət tərəfdaşlarından biri olduğunu bildirib:

“Adətən hər hansı bir ölkənin milli valyutası ucuzlaşan zaman, yəni məhsul yerli istehsaldırsa, onun xaricə satışı stimullaşdırılır, daha çox milli valyuta ilə alıb dollarla satan zaman yerli istehsalçıların gəlirləri artır. Ancaq təəssüf ki, Azərbaycanda iqtisadi sahələrdə ciddi inhisarçılıq, gömrük rüsumları, vergiləri yüksək olduğuna, eyni zamanda gömrük orqanları bəyanamə qiyməti titbiqi altında idxal olunan mallara əlavə sahibkarın real aldığı qiymətdən əlavə rüsum və vergi hesablamaq məqsədi ilə daha yüksək göstərməyə məcbur etdiyinə görə bizdə analoqu olmayan stuasiya yaranır”.

Nazim Bəydəmirli Azərbaycana gələn məhsulların ucuzlaşması əvəzinə daha da bahalaşdığını vurğulayıb:

“Proseslər Azərbaycanda belədir. Ya qiymət yerində qalır, ya da bahalaşır. Türkiyə istehsalı məhsulların Azərbaycanda ucuzlaşmalı olduğu halda bizdə onun əksi prosesini görürük. Bu iqtisadi nəzəriyyəyə, praktikaya zidd olan addımlardır. Bunun səbəbi də süni qiymət artımıdır, hansı ki, onu gömrük ilə vergi orqanları yaradır. Sahibkarlara müxtəlif maneələr törədərək, ucuzlaşmadan istifadə edərək, vətəndaşlar daha çox istehlak malları gətirmək üçün çaba göstərsələr də, onun müxtəlif inzibati yollarla qabağını alırlar. Bu monopoliyaya xidmət edən bir sistemdir”.

İqtisadçı ekspert Xalid Kərimli isə deyib ki, Azərbaycanda satılan Türkiyə məhsullarının qiymətində enmə müşahidə olunub:

“Mağazalarda olan, xüsusən də onlayın satışda köhnə qiymətlərlə abarlara, topdansatış mərzələrinə lirə ilə satılan məhsullar manatda ucuzlaşmış olur, avtomatik olaraq bundan alıcılar faydalanır. Bundan əlavə sahibkarlar köhnə lirə qiymətləri ilə razılaşdığına görə, prosesdən uduşlu çıxırlar. Yəni, məhsulu daha ucuz almış olurlar”. 

İqtisadçı ekspertin fikirincə, bir müddət keçəndən sonra sahibkarlar lirə ilə aldıqları məhsulların qiymətini bahalaşdırmağa başlayırlar.

Aylin