"Morgan Stanley" istixana qazı emissiyalarının azaldılmasını dəstəkləmək üçün yaradılmış qlobal bankçılıq ittifaqından ayrılan sonuncu "Wall Street" bankı oldu.  

Bank yaydığı açıqlamada ittifaqdan ayrıldığını bildirib. Bu həftənin əvvəlində "Citigroup Inc." və "Bank of America Corp." da ittifaqdan ayrılmaq qərarı vermişdi.  

ABŞ-da banklar Respublikaçı siyasətçilər tərəfindən kəskin tənqidlərə məruz qalıb. Noyabr ayında Texas ştatında kömür tədarükünü məhdudlaşdırmaq üçün iqlimə uyğun investisiya strategiyalarından istifadə etdiklərinə görə, "BlackRock Inc.", "Vanguard Group Inc." və "State Street Corp." şirkətlərinə qarşı antitrest qanunlarını pozma iddiası ilə məhkəmə iddiaları qaldırılmışdı.  

Birləşmiş Millətlər Təşkilatının dəstəyi ilə "Glasgow Financial Alliance for Net Zero" tərəfindən koordinasiya edilən ittifaq bu həftənin əvvəlində etdiyi açıqlamada “xüsusi kapitalın cəlb edilməsi səylərini ikiqat artıracağını” və enerji keçidini dəstəkləmək üçün yeni dəyişikliklər etdiyini bildirib.  

"Goldman Sachs" və "Wells Fargo" da ittifaqdan ayrılan banklar arasındadır. Bütün banklar öz sıfır karbon emissiyası hədəflərinə və müştərilərinin karbon izlərini azaltmalarına kömək etməkdə qərarlı olduqlarını bildiriblər.  

"Net-Sıfır Bankçılıq İttifaqı", kredit, investisiya və kapital bazarı fəaliyyətlərini 2050-ci ilə qədər sıfır istixana qazı emissiyası ilə uyğunlaşdırmağı öhdəsinə götürən aparıcı qlobal banklardan ibarətdir.  

2021-ci ilin aprelində fəaliyyətə başlayan ittifaqın ümumi aktivləri 74 trilyon dollar olan, 44 ölkədən 145 üzvü var idi.  

Rəhim