“SpaceX” və “Tesla” şirkətinin rəhbəri İlon Maskın sərvəti “Tesla” səhmlərinin çökməsi səbəbindən son bir gündə 13 mlrd. ABŞ dollarından çox azalıb.

 “Bloomberg”in verdiyi məlumata görə, Maskın sərvəti 13,6 mlrd. dollar azalaraq 176 mlrd. dollara enib.

“Amazon”un təsisçisi Cef Bezosun sərvəti isə 5,55 mlrd. dollar azalaraq 180 mlrd. dollar təşkil edib. Beləliklə, Bezos dünyanın ən zəngin adamları siyahısında birinci, Mask isə ikinci pillədə yer alıb.

Qeyd edək ki, ötən gün “Tesla”nın səhmləri 8,06% azalaraq 682,22 dollara enib. Bu həftənin əvvəlindən isə şirkətin səhmləri 12,7% ucuzlaşıb (APA). 

Valyuta.Az xatırladır ki, “Tesla”nın səhmlərinin ucuzlaşması "Bitkoin"in ucuzlaşması fonunda baş verir. Belə ki, İlon Mask bir müddət əvvəl 1.5 milyard dollar dəyərində "Bitkoin" almışdı. Hazırda "Bitkoin" 58 min dollar həddindən sonra ucuzlaşmağa başlayıb və 45 min dollar səviyyəsində satılır.