Macarıstan demokratik standartlara cavab vermədiyinə görə Avropa İttifaqından 1,04 milyard avro subsidiya almaq hüququndan məhrum olub. 

Valyuta.az xəbər verir ki, bu barədə Agence France Press (AFP) Avropa Komissiyasının (AK) mətbuat xidmətinin müvafiq bəyanatına istinadən məlumat yayıb.

Vəsait almaq üçün Macarıstan hakimiyyəti ötən ilin sonuna qədər milli hüquq sistemində dəyişikliklər etməli idi. Brüssel xüsusilə Budapeşti korrupsiyaya qarşı mübarizəni gücləndirməyə və Macarıstan mediasının müstəqilliyini təmin etməyə çağırıb. Avropa Komissiyası Macarıstanın struktur cəhətdən zəif bölgələrini dəstəkləmək üçün yardım ayırmağı planlaşdırırdı.

Yaranmış vəziyyətə reaksiya verən ölkənin baş naziri Viktor Orban Budapeştin maliyyə maraqlarını qorumaq niyyətini açıqlayıb. 2024-cü ilin dekabrında o, digər məsələlərlə yanaşı, Macarıstan vətəndaşlarından pul almaq cəhdləri səbəbindən Aİ büdcəsini bloklayacağını xəbərdar edib. Müxalifət lideri Peter Magyar 2026-cı ilin yazına təyin edilmiş növbədənkənar parlament seçkilərinin keçirilməsinə çağırıb.

2018-ci ilin sentyabr ayından Macarıstan da Aİ Nizamnaməsinin 7-ci maddəsinə tabedir ki, bu da qanunun aliliyini ciddi şəkildə pozduğuna görə üzv ölkəyə qarşı sanksiyaların tətbiqini nəzərdə tutur. Bu, Macarıstanın Aİ Şurasında səsvermə hüququnun dondurulmasını əhatə edə bilər.

Paşa Məmmədli