Ukraynanın ümumi dövlət borcu (birbaşa və zəmanətli) noyabr ayında oktyabrla müqayisədə 2,8% və ya 4,37 milyard dollar artaraq rekord 159,74 milyard dollara çatıb. 

Valyuta.Az xəbər verir ki, bu barədə "Ukrayna" xəbər agentliyi ölkənin Maliyyə Nazirliyinə istinadən məlumat yayıb.  

Oktyabr ayında borc 155,37 milyard dollar təşkil edirdi ki, bu da o dövr üçün rekord idi. Hesabat tarixinə birbaşa dövlət borcu ümumi olaraq 6,365,47 milyard qrivna (153,03 milyard dollar) təşkil edib. Halbuki keçən ay bu göstərici 6,134,58 milyard qrivna (148,61 milyard dollar) idi. Eyni zamanda, birbaşa xarici borc ay ərzində 105,9 milyard dollardan 109,57 milyard dollara yüksəlib.  

Birbaşa daxili borc isə qrivna ilə 1,762,97 milyarddan 1,807,99 milyard qrivnaya (42,71 milyard dollardan 43,47 milyard dollara) qədər artıb. Ayın sonunda dövlət zəmanətli borc 279,21 milyard qrivna (6,71 milyard dollar) təşkil edib.  

2023-cü ildə Ukraynanın dövlət borcu 145,32 milyard dollar idi ki, bu da rekord göstərici idi. O zaman borc 30,4% və ya 33,87 milyard dollar artmışdı.  

Ukrayna hakimiyyəti dəfələrlə vergilərin və aksiz dərəcələrinin artırılmasının qaçılmaz olduğunu bildirib. Kiyev bəyan edir ki, ölkə yalnız hərbi büdcə xərclərini öz hesabına təmin edə bilir, digər bütün sahələr isə müttəfiqlərin yardımı ilə maliyyələşdirilir.  

Hökumət 2025-ci il üçün büdcə layihəsini "Rada"ya təqdim edib. Layihədə 1,6 trilyon qrivna (38,68 milyard dollar) məbləğində kəsir nəzərdə tutulur və milli valyutanın dollar qarşısında məzənnəsinin 45 qrivnaya düşəcəyi planlaşdırılır. "RBC-Ukrayna" agentliyinin sənədin təhlilinə əsaslanan məlumatına görə, gələn ilin sonuna ölkənin dövlət borcu ÜDM-in 101,8%-nə bərabər olacaq və 34,8 milyard dollar xarici kredit cəlb etmək planlaşdırılır.  

Eyni zamanda, Qərb müttəfiqləri Kiyevə öz maliyyə ehtiyaclarını təmin etmək üçün əlavə mənbələr tapmağı tövsiyə edir.  

Rəhim