Milyarder iş adamı Ceff Bezosun Mayamidəki qonşusu - 1,8 dönümlük boş torpaq sahəsinə 200 milyon dollar qiymət tələb edir.

Valyuta.az xəbər verir ki, gizli bir satıcı Ceff Bezosun Cənubi Floridada aldığı mülklərin yanındakı boş sahil torpağını 200 milyon dollara satmaq niyyətindədir. 

Təxminən 0,74 hektar bu torpaq sahəsi, "Milyarderlərin sığınacağı" adlandırılan süni baryer adası İndian Creekdə yerləşir. Müqaviləyə vasitəçilik edən İlya Reznik satıcının şəxsiyyətini açıqlamasa da, qiymətlə bağlı danışıqlara açıq olduqlarını bildirib:

"Artıq bir neçə potensial müştəriyə yeri göstərmişəm və aydın məsələdir ki, alıcı milyarder olacaq".

Torpaq 200 milyon dollara satılmasa belə, Reznik bunun bölgə üçün rekord qiymət olacağına inanır. Bunun əsas səbəbi, "Amazon.com Inc."in təsisçisi Ceff Bezosun 2023-cü ildən bəri İndian Creekdə üç mülk almasıdır. Bu mülklərdən ikisi hazırda satışda olan torpaq sahəsinin yaxınlığında yerləşir. Bezos bu il üçüncü mülkünü təxminən 87 milyon dollara almışdı.

Reznik əlavə edib: "Məncə, 200 milyon dollar böyük bir rəqəmdir, amma sonda alıcının daha çox ödəyəcəyindən əminəm, çünki qonşu Bezosdur. Bezos İndian Creekə gəlməzdən əvvəl bu qiymətlər mövcud deyildi".

Rəsmi sənədlərə görə, boş torpaq sahəsi 2018-ci ildə Delaver ştatında qeydiyyatdan keçmiş "SMM Sunny Holding LLC" şirkəti tərəfindən 27,5 milyon dollara alınıb. Reznikin sözlərinə görə, hazırkı sahib torpaq üzərində 25.000 kvadrat fut (2.322,6 kvadrat metr) sahəyə malik mülk üçün ilkin dizaynlar hazırlayıb və bu, gələcək alıcıya təqdim olunacaq.

Paşa Məmmədli