"Starbucks" ("SBUX.O") işçiləri Nyu-York da daxil olmaqla, daha dörd ABŞ şəhərində tətilə qoşulub. 

Valyuta.Az xəbər verir ki, ümumilikdə 10,000-dən çox baristanı təmsil edən "Workers United" həmkarlar ittifaqı bu barədə məlumat yayıb.

Cümə günü başlayan və əvvəlcə Los-Anceles, Çikaqo və Sietldəki "Starbucks" kafelərini bağlayan beş günlük tətilə indi Nyu-Cersi, Nyu-York, Filadelfiya və Sent-Luisdəki bəzi filiallar da qoşulub. Həmkarlar ittifaqının bəyanatında Nyu-Cersidə tətilin hansı şəhərdə baş verdiyi dəqiq göstərilməyib.

"Starbucks" isə bildirib ki, tətil nəticəsində yaranan fasilələr şirkətin fəaliyyətinə ciddi təsir etmir, çünki yalnız bir neçə ABŞ mağazası bu hadisələrdən təsirlənib.

"Workers United" təklif edir ki, saatlıq işçilərin minimum əmək haqqı dərhal 64%, üçillik müqavilə müddətində isə 77% artırılsın. Şirkət bu artımı "dayanıqsız" adlandırıb.

Həmkarlar ittifaqı Kolumbus (Ohayo), Denver və Pittsburq daxil olmaqla, ümumilikdə 10 şəhərdə tətil edir. Tətilin xüsusilə bayram mövsümündə şirkətin Milad satışlarına təsir göstərə biləcəyi vurğulanır.

Qeyd edək ki, "Starbucks" ABŞ-da 11,000-dən çox mağazada təxminən 200,000 işçi çalışdırır. Şirkət ilə həmkarlar ittifaqı arasında əməkhaqqı, işçi sayı və iş qrafikləri ilə bağlı mübahisələr danışıqların dalana dirənməsinə və tətillərə səbəb olub.

"Workers United" cümə günü xəbərdarlıq edib ki, tətil çərşənbə axşamına, yəni Milad ərəfəsinə qədər "yüzlərlə mağazaya" yayıla bilər.

"Starbucks" aprel ayında həmkarlar ittifaqı ilə danışıqlara başlasa da, bu ay bildirib ki, 30 razılaşmanın əldə edildiyi səkkizdən çox müzakirə sessiyası keçirilib.

Rəhim