Gürcü fermerləri hökumətdən ölkəyə kivi idxalına nəzarətin gücləndirilməsini tələb edirlər. İstehsalçılar iddia edirlər ki, qeyri-kafi nəzarət səbəbindən İran meyvələri Gürcüstan məhsulu kimi Yaponiyaya ixrac olunur. 

Valyuta.az xəbər verir ki, bu barədə "Commersant.ge" məlumat yayıb.  

"İrandan idxal olunan kivini Gürcüstan məhsulu adı ilə Yaponiyaya satırlar. Belə bir-iki hal ola bilər ki, heç kim bunu bilməsin və görməzdən gəlsin. Amma sənin bir hektar belə kivi plantasiyanın yoxdursa, bəs necə bir neçə ton məhsulu ixrac edirsən?" - deyə Kivi İstehsalçıları Assosiasiyasının rəhbəri Demur Pipiya (Demur Pipiia) jurnalistlərə açıqlama verib.  

Fermerlər hökumətdən əvvəllər qəbul edilmiş, markalanma qaydalarını pozan ixracatçılara cərimələrin tətbiqini nəzərdə tutan qərarın icrasını tələb edirlər.  

"İran kiviləri idxal olunur və Gürcüstan sertifikatı ilə satılır. Qaydaların pozulması aşkar edildikdə ixracatçı bir neçə min lari məbləğində cərimə olunmalı idi, lakin belə hallara rast gəlinmir", - deyə Pipiya vurğulayıb.  

Kivi İstehsalçıları Assosiasiyasından bildirilib ki, onların ixracatçılarla birbaşa əlaqəsi yoxdur. Pipiya əmindir ki, düzgün dövlət idarəçiliyi ilə Gürcüstan yüksək keyfiyyətli kivini Yaponiyaya heç bir re-ixrac olmadan öz gücü ilə təmin edə bilər.  

"Bu, fermerlərin ayağa qalxmasına kömək edərdi", - o əlavə edib.  

Rəsmi statistika göstərir ki, bu il Gürcüstanda kivi idxalı tarixi maksimuma çatıb. 2024-cü ilin yanvar-sentyabr aylarında ölkəyə ümumi dəyəri 1,1 milyon dollar olan 1980 ton kivi gətirilib. Bu idxalın 96%-i, yəni 1904 tonu və 955,7 min dolları İrana məxsusdur.  

Rəhim