Rusiyada məhkəmənin Google-ə qarşı rusiyalı telekanalların YouTube hesablarının bloklanmasına görə təyin etdiyi iddianın məbləği tezliklə şirkətin öz dəyərini üstələyəcək. 

Valyuta.az xəbər verir ki, bu barədə TASS ekspertlərə istinadən məlumat yayıb.

Rusiya Ali İqtisad Məktəbinin Təhsil İnstitutunun analitiki Roman Yankovskiyə görə, Google açıq bir şirkətdir və onun dəyərini müəyyən etmək mümkündür, belə ki, şirkətin dəyəri Google-un ana şirkəti olan Alphabet-in səhmlərinin birjadaxili qiymətinə əsasən hesablanır.

"Şübhəsiz ki, iddianın məbləği tezliklə Google-un dəyərini üstələyəcək, çünki bu rəqəm hər həftə iki dəfə artır və bir il ərzində iddianın məbləği hətta 100 sıfırlı rəqəm olan “google” ədədini belə üstələyə bilər", - deyə Yankovski bildirib.

Prezident yanında Rusiya Xalq Təsərrüfatı və Dövlət Qulluğu Akademiyasının İPEİ Rusiya-OECD mərkəzinin rəhbəri Antonina Levaşenko ekspertin fikirlərini təsdiqləyərək bildirib ki, şirkətə qarşı təyin edilən iddianın məbləği onun dəyərini əhəmiyyətli dərəcədə üstələyir. 

Onun sözlərinə görə, bu qərar ehtimal ki, internet platformasının kontentin moderasiyası qaydalarına, xüsusilə də siyasi səbəblərə görə məhdudiyyət tətbiq etməsinə təsir göstərmək məqsədilə qəbul edilib.

Yankovski vurğulayıb ki, Google, çox güman ki, bu iddia üzrə kompensasiya ödəməyəcək və Rusiya Federasiyası da şirkətdən bu məbləği ala bilməyəcək. Bunun səbəbi isə Google-un Roskomnadzora tabe olmaması və Rusiyada olan bütün əmlakını ölkədən çıxarmasıdır.

Ekspert əlavə edib ki, hətta Rusiya Federasiyası Roskomnadzor və ya digər orqanlar vasitəsilə icra işlərinə başlasa belə, bu işlər yalnız Rusiya hüdudlarından kənarda həyata keçirilə bilər.

29 oktyabr tarixində rusiyalı telekompaniyaların YouTube-da hesabların bloklanmasına görə Google-dan iki undetsilyon rubl tələb etdiyi məlum olub. Undetsilyon isə 36 sıfırlı bir rəqəmdir.

Nicat