Dünya neft bazarında qiymətlər sabit qalmaqda davam edir. 

Valyuta.Az-ın verdiyi xəbərə görə, əvvəlki gün qiymətlərdə eniş baş versə də, ABŞ-ın strateji ehtiyatlarını artırmaq üçün neft alacağını bildirməsi bu enişi qismən dayandırıb. Bununla belə, gələcəkdə tələbatın zəifləyəcəyi gözləntiləri qiymətlərə təzyiq göstərir.

Bu səhər Brent markalı neftin qiyməti barel başına 71,37 dollar ətrafında, WTI markalı neftin qiyməti isə 67,33 dollar səviyyəsində dəyişməz qalıb.

Nissan Securities-dən Hiroyuki Kikukava qeyd edib ki, “Yaxın Şərq üzrə proqnoz hələ də narahatlıq doğurur, lakin bazar İsrail və İran arasında müvəqqəti gərginliyin azalmasını gözləyir”.

O həmçinin bildirib ki, “ABŞ-ın ehtiyatları doldurma planı bazara dəstək versə də, yaxın aylarda tələbatda ciddi artım gözlənilmir. Xüsusilə də Çində tələbat zəifdir və qış mövsümü də hələ uzaqdadır.”

ABŞ bazar ertəsi bildirib ki, strateji ehtiyatları üçün 2025-ci ilin may ayına qədər 3 milyon barel neft alacaq.

Bu arada, Yaxın Şərqdə gərginlik yüksək olaraq qalır. İran Xarici İşlər Nazirliyinin nümayəndəsi İsmayıl Baqei İsrailin həftəsonu həyata keçirdiyi hücuma cavab olaraq Tehranın bütün mümkün vasitələrdən istifadə edəcəyini vurğulayıb.

Nicat