Rusiya və Danimarka arasında ticarət, əvvəlki iki ildə baş verən rekord həddə azalmadan sonra sabitləşib. 

Valyuta.az xəbər verir ki, bu barədə Rusiyanın Danimarkadakı səfiri Vladimir Barbin məlumat verib. 

"Hazırda vəziyyət sabitləşib, ikitərəfli ticarət həcmlərindəki sürətli azalma dayandırılıb. 2024-cü il nəticələri təxminən 2023-cü il səviyyəsində olacaq", – deyə diplomat qeyd edib.

Ötən il Rusiya ilə Danimarka arasında ticarət dövriyyəsi 2021-ci illə müqayisədə təxminən beş dəfə aşağı olub. Danimarkadan Rusiyaya mal tədarükü 4,8 dəfə azalaraq 300 milyon dollara enib, əks istiqamətdə isə göstərici 5,2 dəfə azalaraq 400 milyon dollar təşkil edib.

Barbinin sözlərinə görə, Danimarka üçün Rusiya əsas ticarət tərəfdaşlarından olmadığı üçün Rusiya ilə ticarətin azalması krallığın iqtisadiyyatına əhəmiyyətli təsir göstərməyib. 2021-ci ildə Rusiyanın Danimarkanın ümumi xarici ticarətində payı cəmi 1,5% təşkil edib.

Nicat