2024-cü ilin sentyabrında Yaponiya və Rusiya arasındakı ticarət dövriyyəsi 2023-cü ilin eyni dövrü ilə müqayisədə 22,78% artaraq 98,6 milyard yenə (indiki məzənnə ilə 659 milyon ABŞ dolları) çatıb. 

Valyuta.az xəbər verir ki, bu, Yaponiyanın Maliyyə Nazirliyi tərəfindən dərc olunan statistik məlumatlara əsasən TASS-ın hesablamalarında əks olunub.

Bununla yanaşı, cari maliyyə ilinin ilk yarısında (aprel-sentyabr) iki ölkə arasında ticarət dövriyyəsi 10,24% azalıb. Sentyabrda Yaponiyadan Rusiyaya ixrac 98,5% artaraq 33,3 milyard yenə (222,5 milyon ABŞ dolları), Rusiyadan idxal isə 2,8% artaraq 65,3 milyard yenə (436,7 milyon ABŞ dolları) çatıb. Ancaq aprel-sentyabr ayları arasında Yaponiyanın Rusiyaya ixracı 13,5% azalaraq 183 milyard yen (1,2 milyard ABŞ dolları), Rusiyadan idxal isə 8,6% azalaraq 380 milyard yen (2,5 milyard ABŞ dolları) təşkil edib.

Ticarət dövriyyəsinin əsas kateqoriyaları yapon avtomobilləri (Yaponiya-Rusiya ixracının 65%-dən çoxu) və Rusiya enerji daşıyıcılarıdır (Rusiyadan idxalın 70%-ə yaxını). Sentyabrda məhz bu kateqoriyalarda artım ticarət dövriyyəsinin artmasına səbəb olub. Bu ilin avqust ayında iki ölkə arasında ticarət dövriyyəsi 23,81% artaraq 105,59 milyard yenə (743 milyon ABŞ dolları) çatmışdı. Bu artım avqust 2022-ci ildən bəri ilk dəfə qeydə alınmışdı.

Avtomobil tədarükü

2023-cü ilin sentyabrı ilə müqayisədə Yaponiya 2024-cü ilin sentyabrında Rusiyaya minik avtomobillərinin ixracını 132,2% artırıb. Bununla yanaşı, cari maliyyə ilinin ilk yarısında (aprel-sentyabr) Yaponiya Rusiyaya minik avtomobillərinin ixracını keçən ilin eyni dövrü ilə müqayisədə 11,3% azaldıb. Sentyabrda Yaponiya həmçinin Rusiyaya nəqliyyat vasitələri üçün ehtiyat hissələri və komplektləşdirici hissələrin ixracını 21,3% artırıb. Aprel-sentyabr aylarında bu göstərici 7,9% artıb.

Enerji daşıyıcıları

2024-cü ilin sentyabrında Yaponiya Rusiyadan mayeləşdirilmiş təbii qazın (MTQ) idxalını 2023-cü ilin eyni dövrü ilə müqayisədə 11,7% artırıb. Bununla yanaşı, sentyabrda Yaponiya Rusiyadan kömür idxalını 34,2% azaldıb və G7 ölkələri tərəfindən qiymət tavanı tətbiq edilən nefti (MTQ idxalı ilə bağlı "Saxalin-2" layihəsi istisna olmaqla) Rusiyadan idxal etməyib.

Cari maliyyə ilinin ilk yarısında (aprel-sentyabr) Yaponiya Rusiyadan MTQ-nin idxalını 7,1%, kömürün idxalını isə 49,9% azaldıb.

Digər məhsullar

2024-cü ilin sentyabrında Yaponiya Rusiyadan taxıl idxalını 2023-cü ilin eyni dövrü ilə müqayisədə 997,9% artırıb. Həmçinin, sentyabrda Rusiyadan Yaponiyaya tərəvəz tədarükü 100%, dəniz məhsulları tədarükü isə 21,6% artıb. Bununla yanaşı, Rusiyadan Yaponiyaya çuqun və polad məmulatlarının tədarükü 81%, əlvan metallurgiya məmulatlarının tədarükü isə 35,2% azalıb.

Sentyabr ayında Yaponiya Rusiyaya plastik tədarükünü 829,2% artırıb, lakin kağız məhsullarının tədarükünü 43,8% azaldıb. Yaponiya həmçinin Rusiyaya tibbi məhsulların tədarükünü 75,5% azaldıb.

Nicat