İstanbul Planlaşdırma Agentliyi (İPA), 2024-cü ilin sentyabr ayı üçün "İstanbulda Yaşama Xərcləri" hesabatını yayımlayıb.

Valyuta.Az-ın verdiyi xəbərə görə, hesabatdan İstanbulda həyat bahalığının artmağa davam etdiyi məlum olub.

Yaşama xərcləri illik olaraq 60,3% artıb

Hesabata görə, İstanbulda yaşamağın xərci keçən ilin eyni dövrü ilə müqayisədə 60,3% artıb. Sentyabr 2024-ə əsasən, İstanbulda dörd nəfərlik bir ailənin aylıq orta yaşama xərci 71.431 TL (3550 AZN) olaraq müəyyən edilib. Bu məbləğ, təkcə bir əvvəlki aya nisbətən 3,62%-lik bir artımı əks etdirir. Belə ki, sentyabr ayında dörd nəfərlik ailənin yaşama xərci, avqust ayına nisbətən 2.498 TL artıb. Bu isə yaşama xərclərinin davamlı artım trendində olduğunu göstərir.

Ət və qiymə məhsulları qiymət artımı rekord həddədir

Qida məhsulları arasında ən diqqətçəkici qiymət artımı, ət və qiymə kateqoriyasında müşahidə edilib. Ət və qiymə məhsullarının qiymətləri keçən ilin eyni ayına nisbətən 69,42% artıb. Bu vəziyyət, əsas istehlak məhsullarındakı qiymət artımlarının nə qədər yüksək olduğunu göstərir.

Hesabat, İstanbulda yaşamağın getdikcə çətinləşdiyini və xüsusilə qida məhsulları qiymətlərindəki yüksək artımların ailə büdcələrini daha da çətinləşdirdiyini ortaya qoyur.

Aydın