İrlandiyanın Məlumatların Mühafizəsi Komissiyası (DPC) cümə günü bəzi istifadəçilərin parollarını qorumadan və ya şifrələmədən səhvən saxladığı üçün "Meta"nı 91 milyon avro cərimələyib.

Qaynarinfo xəbər verir ki, bu barədə “Reuters” məlumat yayıb.

"Bu cür məlumatlara girişi olan şəxslərin sui-istifadə risklərini nəzərə alaraq, istifadəçi parollarının ictimai sahədə saxlanmaması geniş şəkildə qəbul edilir", deyə DPC rəhbərinin müavini Qrem Doyl bildirib.

Cavab olaraq "Meta" sözçüsü, şirkətin 2019-cu ildə təhlükəsizlik auditi zamanı aşkar etdikdən sonra səhvi düzəltmək üçün dərhal addımlar atdığını və parolların sui-istifadə edildiyinə və ya düzgün istifadə olunmadığına dair heç bir sübut olmadığını bildirib. Sözçü həmçinin əlavə edib ki, "Meta" bütün istintaq boyu DPC ilə konstruktiv əməkdaşlıq edib.

Qeyd olunur ki, Amerika şirkətinə qarşı istintaq beş il əvvəl "Meta" İrlandiya Məlumatların Mühafizəsi Komissiyasına (DPC) bəzi parolları “açıq girişdə” saxladığı barədə məlumat verdikdən sonra başlayıb. O zaman "Meta" hadisəni açıq şəkildə etiraf edib və DPC parolların üçüncü tərəflər üçün əlçatan olmadığını bildirib.

Ümumilikdə, Avropa tənzimləyicisi "Meta"nı 2018-ci ildə tətbiq edilən Ümumi Məlumatların Mühafizəsi Qaydalarının (GDPR) pozulmasına görə 2,5 milyard avro, o cümlədən 2023-cü ildə "Meta"nın hazırda etiraz etdiyi 1,2 milyard avroluq rekord cərimə də daxil olmaqla, cərimələyib.

Paşa Məmmədli