Rusiyanın ABŞ dövlət istiqrazlarına investisiyaları oktyabrda 31 milyon dollardan noyabrda 28 milyon dollara düşüb. 

Valyuta.az xəbər verir ki, bu barədə "RİA Novosti" ABŞ Maliyyə Nazirliyinin məlumatlarına istinadən yazıb.

Statistikaya görə, noyabrda Rusiya portfelinə 25 milyon dollar uzunmüddətli, 3 milyon dollar isə qısamüddətli qiymətli kağızlar daxil olub. Yaponiya 1,128 trilyon dollarla ABŞ borcunun ən böyük sahibi olaraq qalır, 782 milyard dollarla Çin ikinci yerdədir.

2022-ci ildə ABŞ Rusiya Federasiyasının Mərkəzi Bankına Amerikadakı aktivləri ilə əməliyyatlar aparmağı qadağan edən sanksiyalar tətbiq edib. 2023-cü ilin noyabrında Rusiya Mərkəzi Bankı ABŞ xəzinə istiqrazlarını saxlamadığını açıqlayıb.

Eyni zamanda, ABŞ Xəzinədarlığı sərmayələri satınalmanın həyata keçirildiyi maliyyə institutunun yerləşdiyi ölkəyə təyin edir. İnvestorların əsl vətəndaşlığı bilinməyə bilər.

Paşa Məmmədli