Keçən il Almaniyada elan edilmiş təxminən 630 000 vakansiya üçün ixtisaslı kadr çatışmazlığı yaşanıb.

Valyuta.az xəbər verir ki, Almaniyada ixtisaslı kadr tapmaqda çətinlik çəkən şirkətlərdə bir çox vəzifələr vakant olaraq qalır. “Stepstone” iş axtarışı platformasının yeni təhlilinə görə, şirkətlərin 90 faizi vakant işlərə uyğun namizəd tapa bilmir. 2 800 menecer və insan resursları mütəxəssisi də daxil olmaqla 10 000 nəfər işəgötürən arasında sorğu keçirilib. Onların təxminən 76 faizi işçi çatışmazlığı səbəbindən iş yerlərində məhsuldarlığın azaldığını, 90 faizi isə ixtisaslı işçi tapmaqda çətinlik çəkdiyini bildirib. Bu göstərici pandemiyadan əvvəlki səviyyələrlə müqayisədə 16 bənd artım deməkdir.

Xüsusilə dövlət sektorunda çalışan mütəxəssislər kadr çatışmazlığından şikayətlənirlər. Dövlət sektorunda çalışanların 88 faizi bu səbəbdən dolayı  xidmətlərinin təqdim edilməsində problemlər olduğunu bildirib. Səhiyyə və sosial xidmət sektorlarında çalışanların 83 faizi də ixtisaslı kadr çatışmadığını deyib.

Hazırda Almaniyada təxminən 50 000 müəllim və 14 000 tibb bacısı çatışmazlığı var. 

İşəgötürənlərin 90 faizi vakansiyalara uyğun namizəd tapmaqda çətinlik çəkdiklərini bildirib. İxtisaslı işçilərin Almaniyaya miqrasiyasını asanlaşdıracaq yeni qanunun 2024-cü ilin martında qüvvəyə minməsi planlaşdırılır.