Birləşmiş Millətlər Təşkilatı qış mövsümündə Ukraynaya dəstək üçün 268 milyon dollar toplamaq təşəbbüsü ilə çıxış edib.

Valyuta.az “Ukrinform”a istinadla xəbər verir ki, bunu BMT baş katibinin nümayəndəsi Stefan Düjarrik bildirib. Onun dediyinə görə, BMT tərəfdaşları ilə birlikdə qış aylarında 1,3 milyon insana yardım göstərmək üçün vəsait toplamaq təşəbbüsü ilə çıxış edib.

Düjarrik qeyd edib ki, işğalçılar Ukraynanın infrastrukturuna ciddi ziyan vurub və bu, soyuq mövsümdə milyonlarla insanı həddindən artıq risk altında qoyur.

"Yardım ehtiyacı ilə bağlı hesablamalar humanitar təşkilatların kəskin enerji böhranı şəraitində 2,2 milyon insana oxşar xidmətlər göstərdiyi və 4000-dən çox generatoru təhvil verdiyi keçən qış təcrübəsinə əsaslanır", - Düjarrik izah edib.

BMT baş katibinin nümayəndəsi vurğulayıb ki, bu qış BMT cəbhəyanı ərazilərdəki evlərin təcili təmirinə üstünlük verəcək.

"Köçkünlər üçün mərkəzlərdə təmir işləri və məcburi köçkünlərə maliyyə yardımı da prioritet hesab olunur ki, onlar kirayə və ya kommunal xərcləri ödəyə bilsinlər. Humanitar təşkilatlar bələdiyyələrin istilik sistemlərinin təmirinə kömək edəcəklər", - deyə baş katibin nümayəndəsi əlavə edib. 

Qeyd edək ki, avqust ayına olan məlumata görə, Ukraynanın yeraltı qaz anbarlarına artıq 12,3 milyard kubmetrdən çox mavi yanacaq vurulub. Cari istilik mövsümü başlayana qədər 14 milyard kubmetr qaz yığmaq planlaşdırılır.

Energetika Nazirliyinin mətbuat xidmətindən verilən məlumata görə, qazın hasilatı və yeraltı anbarlara vurulması müəyyən olunmuş qrafikə uyğun aparılır. Bundan əlavə, Ukrayna istehsal templərini artırır. 

Mütəxəssislərin fikrincə, zədələnmiş energetika obyektlərinin təmiri üçün avadanlıq və pul çatışmazlığı səbəbindən Ukrayna enerji sisteminin sabitliyini müharibədən əvvəlki, ən azı ötən ilin oktyabrı səviyyəsinə qaytara bilməyəcək.

Baş nazir Denis Şmıxal bildirib ki, Ukraynada qış mövsümü çətin keçəcək, hökumət qışın öhdəsindən gəlinməsi üçün müxtəlif senarilərə hazırlaşır.

Nicat